Сè додека не се постигне вообичаениот сооднос меѓу власта и опозицијата, претседателот на парламентот нема да закаже седница на Комисијата во која сега мнозинството е кај ВМРО-ДПМНЕ и Беса – која, пак, го напушти парламентарното мнозинство
Изборот на уставни судии не е единствена точка што е закочена во Комисијата за избори. Блокадата на ова собраниско тело спречува да се „избалансира“ и распоредот на сили во другите комисии, каде што дел од досегашните членови станаа градоначалници, а на нивно место влегоа нови пратеници
Претседателот на Собранието Талат Џафери нема да ја свика Комисијата за прашањата на изборите и именувањата за утврдување на предлози на четворица уставни судии, како што побара опозициските пратеници, сè додека не се врати соодносот на власта и опозицијата во ова работно тело.
Според Џафери, распоредот на сили во оваа Комисија сега е во спротивност со членовите 20 и 108 од Деловникот, каде што е утврдено кој го има мнозинството во работните тела. Во тој контекст, Џафери побара пратеникот Фадил Зендели, да биде доблесен и да го отстапи местото во ова работно тело, со оглед на тоа што Беса замина во опозиција, а Алтернатива влезе во Владата.
„Зошто Зендели си даде оставка од потпретседателското место во парламентот? Бидејќи Деловникот утврдува од чии редови се потпретседателите. Така е и во Комисијата. Укажувам на секоја координација да се врати соодносот, но очигледно тоа го гледаат како дневно-политичка калкулација. Јас во тоа не можам да се мешам, но во крајна инстанца ја попречува функционалноста на Собранието и е спротивно на интересот на граѓаните“,
рече Џафери на денешната средба со медиумите.
Тој вели дека секако ќе го спроведе Деловникот и ќе го поврати соодносот во ова работно тело, но на денешниот брифинг со новинарите Џафери не сакаше да каже дали ова значи разрешување на Зендели и назначување нов член.
„Би било коректно да го направи тоа, како што го направи како потпретседател на Собранието, свесен дека тоа место не му припаѓа нему како опозиција. Статусно местото не ѝ припаѓа на Беса, а тој е пратеник на Беса во опозиција“,
рече Џафери.
Комисијата, додаде собранискиот спикер, треба да го рефлектира мнозинството и од тој момент да работи во полн состав, онака како што е пропорцијата на застапеност на политичките партии.
Како што појасни Џафери, Зендели, по заминувањето на Беса во опозиција на 9 декември 2021 година, поднесе оставка од функцијата потпретседател, затоа што, како што рече, тоа се коси со деловничкиот принцип дека од вкупниот број потпретседатели едно потпретседателско место ѝ припаѓа на најголемата опозициска партија или коалиција. Неговиот статус по поминувањето во опозиција, како што рече, се косеше со правото на најголемата опозициска политичка партија, односно коалицијата на ВМРО-ДПМНЕ да има потпретседател.
Собранието ја констатира оставката на Зендели од претседателското место на 23 декември. Односно во почетокот на истата седница на која беше потврдена и оставката на Зоран Заев од премиерската функција, по што почнаа да течат роковите за формирање на новата влада на Димитар Ковачевски, во која Алтернатива влезе како нов партнер, со поддршка од четворица пратеници, наспроти двајца од Беса, кои заминаа се преселија во опозициските клупи.
„По таа логика, не може местото што го држел кога бил мнозинство да си го задржи како опозиција, затоа што, според пропорционалноста на застапеноста на политичките партии во работните тела, тоа место не и припаѓа на Беса. Тоа место е на СДСМ. Тоа го кажува Деловникот, не го кажувам јас за да бидам нечиј судија или адвокат, но прописот е тој. И од таа причина, на секоја координација е укажано дека треба да се реши ова прашање, за Комисијата за избори и именување да може потоа да покрене процедура, постапка за доекипирање на другите работни тела по однос на пратениците кои заминале од Собранието, како министри или како градоначалници и по однос на пратениците коишто дошле од истите листи кои треба да се вклучат во работа на работните тела“,
рече Џафери.
Тој нагласи дека за разрешување на случајот го има на располагање единствено Деловникот.
Седумте опозициски члена од вкупно 13 члена на Комисијата за избори и именувања неодамна покренаа иницијатива до Џафери, со цел, како што рекоа, да се деблокира собраниската процедура за избор на нови уставни судии, откако Уставниот суд остана без четворица членови на кои им заврши мандатот.
Комисијата треба да предложи четворица кандидати за уставни судии, што потоа Собранието би требало да ги избере со најмалку 61 глас и плус Бадентерово мнозинство за кандидати од заедниците. Но новото собраниско мнозинство кое може да ги испорача овие гласови, нема мнозинство во собраниската комисија од која што треба да произлезат предлозите.
Координаторот на пратеничката група на ВМРО-ДПМНЕ, Никола Мицевски, кој е и член на Комисијата, изјави неодамна дека и опозицијата можеби ќе предложи кандидати за нови уставни судии, доколку Џафери закаже комисиска седница.
Изборот на уставни судии не е единствената точка што е закочена во Комисијата за избори и именувања. Блокадата на ова Комисија спречува да се „избалансира“ и распоредот на сили во другите работни тела, каде што дел од досегашните членови не се веќе пратеници, а, по локалните избори, на нивните места влегоа нови пратеници кои сега не можат да бидат распоредени во работните тела. Исто така, по локалните избори, освен Комисијата за избори и именувања, на чие чело беше Костадин Костадинов (новиот градоначалник на Струмица од СДСМ), без претседател остана и Комисијата за финансирање и буџет, што ја предводеше Тимчо Муцунски (новиот градоначалник на Аеродром од ВМРО-ДПМНЕ).