Денеска измените поминаа на Законодавно-правната, а вчера и на Комисијата за европски прашања, каде што не е усвоен ниту еден амандман
Предлог-законот за изменување и дополнување на Законот за попис денеска помина и на Законодавно-правната комисија, откако вчера доцна попладне заврши општата и амандманска расправа во Комисијата за европски прашања.
Од собраниската прес-служба соопштија дека денеска во 15 часот ќе продолжи 38. седница на чиј дневен ред се две точки – одложување на пописот за септември и измена на Изборниот законик со кој се дефинира употреба на терминали за отчитување отпечаток од прсти за локалните избори и нивно одложување за втората половина на октомври.
Собранието вчера ја почна постапката односно на пленарна седница беше усвоена потребата од донесување на законските измени.
Одложувањето на пописот од април за септември беше договорено на лидерската средба меѓу премиерот Зоран Заев и претседателот на опозициската ВМРО-ДПМНЕ Христијан Мицкоски, за што согласност има и од ДУИ и БЕСА.
Но, Алијанса и Алтернатива не се согласуваат со тоа, па според информациите од претседателот на комисијата за европски прашања, вчера поднеле над 100 амандмани, кои не се разгледувале бидејќи не биле уредно поднесени.