Мицкоски најави дека очекува од понеделник новата влада да почне со работа. Впрочем, Деловникот за работа на Собранието предвидува седницата за избор на влада да трае најмногу два дена
Денеска во 11 часот во македонското Собрание започнува седницата за избор на новата влада, предложена од мандатарот и претседател на ВМРО-ДПМНЕ, Христијан Мицкоски.
Мицкоски најави дека очекува од понеделник новата влада да почне со работа. Впрочем, Деловникот за работа на Собранието предвидува седницата за избор на влада да трае најмногу два дена.
Мандаторот ја образложува програмата и предлогот за состав на владата, по што во Собранието се води единствен претрес.
(ВИДЕО) Нова влада: Порасна бројот на министерства, но се намали бројот на министерки
Гласањето за избор на владата се врши по предлогот за состав на владата во целина, со јавно гласање. Гласањето се врши по завршување на претресот, најдоцна во 24:00 часот, а владата е избрана ако за неа гласале мнозинството од вкупниот број пратеници.
Претседателот на Собранието потоа го известува претседателот на Републиката за изборот на владата.
Парламентарното мнозинство кое се очекува да ја поддржи новата влада во законодавниот дом брои 78 пратеници – 58 од коалицијата на ВМРО-ДПМНЕ, 14 од Вреди и шестмина пратеници од ЗНАМ.
Новата влада што ја предлага Мицкоски ќе брои 24 члена. Покрај премиерот, ќе има уште 23 вицепремиери и министри, од кои 20 со ресор. Мицкоски ќе има пет заменици односно вицепремиери, а еден од нив ќе биде „прв вицепремиер“.
(ФОТО) Сите луѓе на Мицкоски во новата влада
Во владиниот кабинет, 15 членови се од коалицијата предводена од ВМРО-ДПМНЕ, шест од коалицијата „Вреди“ и двајца од ЗНАМ.
Мицкоски го предложи Панче Тошковски за министер за внатрешни работи, а за надворешни работи и надворешна трговија актуелниот градоначалник на О Аеродром, Тимчо Муцуски. За финансии предложена е потпретседателката на ВМРО-ДПМНЕ, Гордана Кочоска-Димитриеска. За заменик-претседател на владата и министер за транспорт е предложен партискиот потпретседател и пратеник во повеќе мандати Александар Николоски, во ресорот одбрана пратеникот и поранешен министер за транспорт Владо Мисајловски, а за информатичко општество и дигитална трансформација е предложен досегашниот дополнителен заменик министер во овој ресор Стефан Андоновски. Министер за локална самоуправа ќе биде поранешниот директор на ЈП „Водовод и канализација“, Златко Перински.
Во новоформираното Министерство за енергетика, рударство и минерални суровини е предложена Сања Божиновска, актуелен член на ИК на ВМРО-ДПМНЕ и експерт во енергетиката, Цветан Трипуновски во земјоделство, шумарство и водостопанство, Весна Јаневска во образование и наука, во Министерството за култура и туризам актерот Зоран Љутков, а во Министерството за спорт ракометарот Борко Ристовски.
Вицепремиерски места ќе имаат и коалициските партнери Социјалистичката партија и Демократската партија на Србите. Љупчо Димовски, претседателот на СП ќе биде вицепремиер и министер за политички систем, а Иван Стоиљковиќ, претседателот на ДПС вицепремиер задолжен за односи со заедниците, додека Шабан Салиу ќе биде министер без ресор задолжен за интеграција и имплементација на декадата на Ромите.
За министер за животна средина и просторно планирање и заменик претседател на владата е предложен Изет Меџити од коалицијата Вреди, за министер без ресор и заменик претседател на владата задолжен за добро владеење е предложен Арбен Фетаи, за министер за здравство Арбен Таравари, а Орхан Муртезани е предложен за министер за европски прашања, додека за министер за социјална политика, демографија и млади е предложен Фатмир Лимани, а за министер за економија Бесар Дурмиши.
Од Движењето ЗНАМ предложени се Игор Филков за министер за правда и Горан Минчев за министер за јавна администрација.
Со изгласувањето на новиот владин состав во Собранието, Христијан Мицкоски ќе биде 13-тиот премиер, а ќе ја предводи 20-тата влада од осамостојувањето на државата.