Експертите регистрираа зголемување на бројот на антисемитски инциденти минатата година – за повеќе од 80 отсто, односно вкупно 4782
Закани, уништување имот, екстремно насилство: бројот на регистрирани антисемитски инциденти е значително зголемен во Германија. Тие зачестија, особено по 7 октомври 2023 година, пишува „Дојче веле“.
Станува збор за егзистенцијални грижи. Многу Евреи и Еврејки во Германија се прашуваат „дали во иднина ќе биде возможен слободен и безбеден живот за Евреите во Германија“, вели Даниел Ботман, генерален директор на Централниот совет на Евреите во Германија.
Централниот совет, додава тој, врз основа на анкетите спроведени во еврејските заедници, знае дека многу од нивните членови денес живеат во страв да не бидат „препознаени“ како Евреи на улица, на јавен простор. И затоа помалку луѓе од порано учествуваат во настаните на еврејската заедница, вели тој.
Податоците од Годишниот извештај на Федералната асоцијација за истражување и информации за антисемитизмот (РИАС) за 2023 година јасно ги покажуваат димензиите на омразата кон Евреите. Експертите регистрираа зголемување на бројот на антисемитски инциденти минатата година – за повеќе од 80 отсто, односно вкупно 4782. РИАС е основана во 2018 година, а тоа е рекорден број на антисемитски инциденти забележани од ова здружение. „Антиизраелскиот активизам“ е многу почесто од порано причина или мотив за антисемитски инциденти – тој се зголемил за четири пати (од 157 на 595).
Само во периодот меѓу 7 октомври 2023 година (првиот ден од терористичкиот напад на Хамас врз Израел) и крајот на минатата година, РИАС регистрира повеќе инциденти отколку во целата 2022 година – 2787, или 32 инциденти мотивирани од антисемитизам дневно. Повеќето од нив, без разлика дали се конкретни закани или само обоени ѕидови, се случиле на улица или на интернет.
Алармантни бројки објави и комесарот на сојузната влада за борба против дискриминацијата, Ферда Атаман. Според неа, 10 772 луѓе ја контактирале нејзината канцеларија минатата година поради случаи на расизам или дискриминација – што е за околу 20 отсто повеќе отколку во 2022 година.