Затворање на граничниот премин Џепчиште – Требиште и преминот Блато, како и затворање на скијачкиот центар „Заре Лазаревски“ во Маврово. Ова се дел од новите одлуки на Владата усвоени на денешната седница, како дополнителни мерки и активности за превенција од ширење на коронавирусот. На владината седница се донесени 16 заклучоци.
Усвоена е препораката за прогласувањето на кризна состојба во Дебар и Центар Жупа и предлогот ќе биде доставен дo претседателот на државата за понатамошно процесуирање.
„Владата му предлага на Претседателот на Република Северна Македонија да одлучи за учество на дел од припадниците на Армијата на Република Северна Македонија (вид и број на сили и капацитети на армиските единици, намена и задачи за кои се бараат и времетраењето на активноста и ангажираноста на армиските единици), во справување со кризната состојба“,
пишува во соопштението.
Центарот за управување со кризи веднаш ќе започне со подготовка на акциски план за превенција и справување со настанатата ситуација на подрачјата на општините, со целосен преглед на расположливи човечки и материјално-технички ресурси и план на координирано дејствување во кризните подрачја.
Жителите од подрачјата на општините Дебар и Центар Жупа кои се надвор од територијата на овие општини, може да се вратат во своите домови на 13.3.2020 година до 00.00 часот на полноќ.
Државниот пазарен инспекторат и Агенцијата за лекови и медицински средства – МАЛМЕД ќе започнат со координирани вонредни инспекциски надзори на сите економски оператори кои продаваат средства за заштита од коронавирусот, согласно мерките, препораките и насоките на Владата.