Целта на еколошката такса од 3,5 денари е порака да се откажеме од нафтата и нафтените деривати, да се движиме почесто со велосипед, тротинет и електрични возила, како што тоа го прави цел свет, вели Заев
Намалувањето на ДДВ на струјата се планира околу 1 јули и според премиерот тоа ќе важи до 1 јули следната година, кога ДДВ ќе биде 10 проценти, а до 1 јули 2023 година тоа повторно ќе се врати на 18 проценти
Ќе има еколошка такса за нафтата од 3,5 денари и намалување на ДДВ за електрична енергија од 18 на 5 проценти. Ова денеска го соопшти премиерот Зоран Заев, посочувајќи дека овие одлуките допрва ќе се донесат како дел од програмата на Владата за екологија.
Целта на еколошката такса од 3,5 денари е порака да се откажеме од нафтата и нафтените деривати и со нивно помало користење да се премине на користење на зелена енергија. Или, како што рече Заев, да се движиме почесто со велосипед, тротинет и електрични возила, како што тоа го прави цел свет.
„Преку една ваква еколошка такса, средствата ги лоцираме директно во фондовите за инвестиции на обновливи извори на енергија, но истовремено и за амортизација при либерализацијата на пазарот на струјата, затоа што сакаме да ги подготвиме земјата и граѓаните за ‘меко спуштање’ при целото пазарно пласирање на цената на струјата со конечна цел да нема покачување на цената на струјата оваа година“,
рече Заев.
Од друга страна, со еколошката такса планирано е во Буџетот да се слеат една милијарда 685 милиони денари за едно полугодие или три милијарди и 300 илјади денари за цела година, кои ќе се лоцираат во фондовите за инвестиции на обновливите извори на енергија.
Намалувањето на ДДВ на струјата се планира околу 1 јули и според премиерот тоа ќе важи до 1 јули следната година, кога ДДВ ќе биде 10 проценти, а до 1 јули 2023 година тоа повторно ќе се врати на 18 проценти.
„Токму преку ваквите механизми овозможуваме социјална стабилност на граѓаните. Ќе ги развиеме сите социјални програми за во 2022, 2023 и 2024 година најсиромашните граѓани да бидат подготвени полесно да ги пребродат сите енергетски промени што ќе дојдат со транзицијата од јагленовите термоелектрани во зелените енергии како што се фотоволтациите и ветерниците“,
рече Заев.