Во тек е процес на дистанцирање, оценува Зоран Јовановски, кој во 2013 година му беше главен ривал на Заев за лидерското место во СДСМ
Зоран Јовановски, некогашен потпретседател на СДСМ, кој му беше главен противкандидат на Зоран Заев во внатрепартиската трка за лидер во 2013 година, оценува дека е во тек раздвижување на политичката сцена и процес на дистанцирање.
„Се раздвижува политичката сцена. Како што ми се гледа мене, во тек е процес на дистанцирање…“,
напиша Јовановски на Фејсбук,
Случајно или не, забелешката на Јовановски, кој се повлече од политиката во 2013 година, доаѓа во период кога во политичките кулоари се шират шпекулации за наводна нова партија со социјалдемократски предзнак што би ја формирал поранешниот лидер на СДСМ, Бранко Црвенковски.
За наводите за нова партија нема потврда од кабинетот на Црвенковски, како поранешен шеф на државата. Заев, пак, кој неодамна по третпат беше избран на чело на СДСМ, изјави денеска дека не верува дека Црвенковски ќе формира друга партија, затоа што, како што рече, тој е СДСМ.
Црвенковски, исто така, се повлече од политичкиот живот откако во 2013 година му заврши последниот мандат на чело на тогаш опозициската партија. На конгресот што се одржа тогаш, противкандидат на Заев му беше и Кире Наумов, ама тој не влезе во „финалето на трката“, додека Јовановски беше фаворитот на Црвенковски.
Црвенковски, пред извесно време, најави дека го замрзнува членството во СДСМ, додека Централниот одбор на СДСМ не се огради од ставовите што премиерот Заев ги изнесе во интервју за БГНЕС.
Сепак, во текот на ажурирањето на членството на СДСМ, пред внатрепартиските избори на кои Заев беше реизбран за лидер, од партискиот врв тврдеа дека и Црвенковски го обновил членството во партијата.