Прогласувањето на вонредната состојба во Лондон ќе овозможи поблиска координација меѓу различните владини служби
Градоначалникот на Лондон Садик Кан денеска објави вонредна состојба за да им помогне на болниците во градот да се справат со зголемениот број пациенти со ковид-19 поради брзото ширење на варијантата омикрон.
Кан рече дека бројот на хоспитализирани, но и недостигот на медицински персонал, се зголемуваат и по консултациите одлучил денеска да прогласи „вонредна состојба“ поради сериозноста на ситуацијата.
„Зголемувањето на бројот на случаи заразени со варијантата омикрон во нашиот главен град е многу загрижувачко. Омикрон брзо стана доминантен, бројот на нови случаи нагло скокна, а бројот на хоспитализирани повторно расте“, рече градоначалникот.
Како што пренесуваат локалните медиуми, прогласувањето на вонредната состојба во Лондон ќе овозможи поблиска координација меѓу различните владини служби со оглед дека Велика Британија вчера го забележа најголемото дневно зголемување на бројот на нови случаи на ковид-19 од почетокот на пандемијата.
Во последните седум дена Лондон регистрираше 65 525 нови случаи на коронавирус, а 26 418 од нив се само во последните 24 часа.