Од Град Скопје велат дека ваков закон ќе овозоможи контрола и чистење на грејните тела на индивидуалните домаќинства, како и следење на емисиите и намалување на штетните ефекти на аерозагадувањето врз здравјето на граѓаните
Град Скопје подготвува закон за оџачарски работи кој ќе ја регулира оваа професија, а според нацрт-законот ќе им наметне и обврска на домаќинствата еднаш годишно да ги чистат оџаците.
Ова градските власти го сметаат како една од мерките против аерозагадувањето во зимските месеци.
„Текстот на нацрт-законот го регулира оџачарството како професија и зема предвид одредени аспекти од законодавството на Германија. Истиот како посебен закон има за цел да го пропише начинот и условите за вршење на оџачарските работи во согласност со законодавството на ЕУ. Со законското решение се предлага и креирање на оџачарски реони кои ќе овозможат јасни одговорности и начини за спроведување на работите кои оџачарот може да ги изведува единствено во рамките на својот реон, како и воведување на обврската домаќинствата и други субјекти еднаш годишно да ги исчистат оџаците“,
велат од Град Скопје.
Германското искуство во подготовката на законот, според соопштението од Градот, се црпи од претставници на градот Нирнберг кои се во дводневна посета на Скопје и имаат состаноци со правен експерт од земјава.
Од Град Скопје велат дека ваков закон ќе овозоможи контрола и чистење на грејните тела на индивидуалните домаќинства, како и следење на емисиите и намалување на штетните ефекти на аерозагадувањето врз здравјето на граѓаните.
Подготовката на законот е во рамки на проектот „Оџачари за чисти печки и чист воздух во Скопје“.
Градските власти најавуваат и дека средното училиште „Здравко Цветковски“ ќе стане државен тренинг центар за идните оџачари откако во истото во 2018 и 2019 година се спроведоа платени обуки за оџачари на лица кои тогаш беа невработени.