Од владејачката партија велат дека, наместо да шири лажни вести, ВМРО-ДПМНЕ треба да одговори зошто го брани Камчев, за што е осуден Милошоски во Германија, каква е улогата на Николоски во изборите во Азербејџан
Ниту комбето кое го спомнуваат, ниту кој било од приведените во акцијата имаат каква било поврзаност со семејството на претседателот Зоран Заев, реагираа денеска од владејачкиот СДСМ на дводневните обвинувања од ВМРО-ДПМНЕ во врска со едно од возилата и со еден од уапсените за шверц на марихуана, во акцијата што МВР ја спроведе со американската ДЕА.
Од СДСМ истакнуваат дека опозициската партија повторно пласира лажни вести
„Веќе немаат граница во нивните лаги, тенденциозни манипулации и конструкции. Неможејќи да се соочат со фактот дека патот на правдата во државата и е чист, дека институциите ја водат бескомпромисно борбата против корупцијата, ВМРО ДПМНЕ ги засилува лагите и шири класични невистини и преку своите партиски мегафони. Пробаа да наштетат на сложена полициска истрага и акција, но не успеаја. Сега повторно пробуваат да конструираат невистина за голема полициска професионална акција, во соработка со ДЕА, во која е запленето големо количество марихуана и повторно нема да успеат. Ниту комбето кое го спомнуваат, ниту кој било од приведените во акцијата имаат каква било поврзаност со семејството на претседателот Зоран Заев“,
се наведува во реакцијата на СДСМ.
Од владејачката партија посочуваат дека, наместо да шират лаги и прават конструкции, Мицкоски и ВМРО-ДПМНЕ треба да одговорат зошто токму тие го бранат Орце Камчев, за какви дела бил осуден во Германија Антонио Милошоски, која е улогата на Александар Николовски во изборите во Азербејџан, за што пратеници од други држави веќе се осудени на затворска казна.