Како интервентен сет мерки, на стопанството наскоро ќе му бидат достапни околу 100 милиони евра за заштита на ликвидноста и на работните места, најави министерката за финансии
Нови шест милиони евра од денеска им се достапни на компаниите за бескаматни кредити за надминување на состојбата предизвикана од коронавирусот и заштита на ликвидноста и работните места. Како интервентен сет на мерки на стопанството наскоро ќе му бидат достапни околу 100 милиони евра за таа намена, најави денеска министерката за финансии Нина Ангеловска.
“Подготвуваме сценарија за најлошото, а се надеваме и работиме за најдоброто. Вчера најавивме дека на компаниите им се веднаш достапни шест милиони евра за бескаматни кредити преку Македонската банка за обнова и развој, а од денеска ќе им бидат достапни уште шест милиони евра“,
рече Ангеловска .
Таа најави дека се во преговори со Европската инвестициска банка за дополнителни 50 милиони евра што ќе им бидат достапни на компаниите за бескаматни кредити. Преку мерката ослободување од плаќање на аконтации од данокот на добивка за сите погодени компани, како што рече, во наредните три месеца ќе се ослободат околу 10 милиони евра, со субвенционирањето на 50 отсто од придонесите околу 20 милиони евра, преку бескаматните кредити ќе им се достапни уште шеесетина милиони евра.
Министерката најави и дека се прават напори за ослободување на граѓаните од ратите за кредити за наредните три месеци.
„Комитетот за финансиска стабилност денеска има состанок на кој ќе се разговара со комерцијалните банки за носење на одлуката за одлагање на плаќањето на ратите за кредитите и за граѓаните и за погодените компании. Треба да најдеме начин кога граѓаните ќе почнат да ги плаќаат ратите, а тоа да не биде тоа преку нарушување на финансиската стабилност“,
потенцира Ангеловска .
Цените на артиклите се враќаат на нивото пред 11 март
Директорот на Државниот пазарен инспекторат Стојко Паунов истакна дека граѓаните не треба да имаат паника од зголемување на цените на основните артикли. Трговците и производителите имаат дадено збор дека нема да вршат зголемување, а сите цени кои се зголемени по 11 март 2020 година, согласно одлуката на Владата, ќе треба да се вратат на нивото на кое биле дотогаш.
Пауновски рече дека треба да стравуваат само оние кои сакаат да профитираат, а тие, тие како што рече, ќе бидат таргет на контролите на Државниот пазарен инспекторат. Тој додаде дека на сите оние кои нема да ги почитуваат мерките на владата, им следува казна до пет илјади евра, согласно Кривичниот законик.
„Сите мора да ги почитуваат мерките. Казните за непочитување се пет илјади евра, а дури има и казни од една година затвор, согласно со членовите 205 и 206 од Кривичниот законик. Бидејќи е вонредна состојба не одиме по редовните закони. Тоа значи дека веќе не одиме по прекршочен законик“,
рече Пауновски.