Апелираме Обвинителството и судот да постапуваат брзо, одлучно и професионално и да бидат суштински дел од институционалниот одговор во санкционирањето на сексуалното и родово базираното насилство, порача денеска пратеничката од СДСМ, Бисера Костадинова-Стојчевска.
„Ја користам оваа пригода, од овде од Собранието, да упатам апел до надлежните институции за брзо и ефикасно решавање на случајот „Јавна соба“ но и на други случаи на физичко и сексуално насилство. Не смееме и нема да дозволиме ниту една форма на насилство или повреда на права на жени, девојки или кој било граѓанин, да останат неказнети. Само на тој начин ќе спречиме нови „Јавни соби“ само на тој начин ќе обесхрабриме нови насилства и посегнување по личните слободи на граѓаните и граѓанките. Жртвите на секаков вид насилство треба да знаат дека не се сами, државата, институциите се тука за да ги заштитат но и соодветно да ги казнат сите оние кои сториле каков било вид на насилство“,
рече таа.
Пратеничката рече дека во тек се подготовки на измени во Кривичниот законик со кои треба да се воведат две нови кривични дела демнење и сексуално вознемирување. Таа апелираше штом законското решение стигне во Собранието, пратениците да го поддржат.
„Случајот „Јавна соба“ ја потврди потребата од законски измени во насока на брзо и ефикасно институционално дејствување, особено имајќи го предвид брзиот развој на социјалните мрежи и новите дигитални платформи и медиуми. За поефикасна и сеопфатна борба против насилството, Министерството за правда најави измени и дополнувања на Кривичниот законик со воведување на две нови кривични дела демнење и сексуално вознемирување, кои веќе се во подготовка. Водејќи се од јавниот интерес и поголем степен на заштита на граѓаните и граѓанките, очекуваме наскоро пред Владата, а потоа и пред пратениците да се најдат овие измени и дополнувања со цел да обезбедиме простор за поширок фронт против секој вид на насилство. По разгледување на предлог-измените и дополнувањата, очекуваме конструктивна дебата и поддршка од сите пратеници за усвојување на новиот Кривичен законик“,
рече Костадинова-Стојчевска.