Според Законот за служба во Армијата, како што велат од СДСМ, во членот 4 е утврдено дека воената служба на граѓаните се состои од доброволно служење на воениот рок и од служба во резервните сили на Армијата. Според овој член, граѓаните имаат право доброволно да го служат воениот рок на начин и услови утврдени со Законот за армија
Претседателката Сиљановска-Давкова нема основно познавање од областите што се во нејзина надлежност, реагираат од Социјалдемократскиот сојуз (СДСМ) на нејзината денешна иницијатива да се покрене дискусија за доброволно служење на воениот рок.
„Претседателката дава предлози за некакви консултации околу прашања што се одамна решени. Доволно ќе беше барем да прочита барем дел од суштинскиот закон кој ја дефинира нејзината надлежност, законот за одбрана и ќе видеше дека во десетина членови и сега е предвидено доброволно служење на воениот рок. И тоа е така речиси две децении“,
велат од СДСМ.
Оттаму посочуваат дека е очигледно дека претседателката е залутана на позицијата врховен командант на армијата.
Според Законот за служба во Армијата, како што велат од СДСМ, во членот 4 е утврдено дека воената служба на граѓаните се состои од доброволно служење на воениот рок и од служба во резервните сили на Армијата.
Според овој член, граѓаните имаат право доброволно да го служат воениот рок на начин и услови утврдени со Законот за армија.
Со тоа, како што велат од СДСМ, претседателката уште на почетокот на својата функција докажува дека нема никаков капацитет да биде врховен командант на македонската армија, односно дека прекршува протоколи, не ги познава законите, а како што додаваат, нема ниту кабинет кој знае да ѝ укаже на елементарните непознавања.
Претседателката Гордана Сиљановска-Давкова денеска во Охрид присуствуваше на показна вежба на припадниците на армијата од Баталјонот на специјални сили кои изведуваат обука во кампот за обука на вода на Охридското Езеро, од каде посочи дека треба да се отвори дискусија за доброволно служење на воен рок.
„Дел од младите имаат желба како некогаш да бидат дел не само од професионалната армија, туку доброволно да се вклучат во вооружените сили. Можеби би требало да поразговараме. Независно која би била одлуката по дискусијата, ова што го видовме овде ни дава чувство на безбедност“,
рече таа.
Во времето на поранешната заедница, според неа, отслужувањето на воен рок значело интеракција на најразлични профили на луѓе, градење односи на солидарност и разбирање.