Засега е извесна само кандидатурата на Заев како носител на листата во четвртата ИЕ, но сè уште не се знае дали и Мицкоски ќе истрча како кандидат на изборите
Во партиските штабови деновиве се прават последните математики за тоа кои се најсоодветните профили за носители на листите во шест изборни единици во земјава
Двете најголеми партии на почетокот на следната недела ќе ги финализираат списоците со кандидати за пратеници на изборите што ќе се одржат на 12 април. Лидерот на ВМРО-ДПМНЕ, Христијан Мицкоски, објави денеска дека кандидатските листи ќе бидат промовирани на јавен настан в среда, откако во вторник ќе бидат потврдени на седница на Централниот комитет на партијата.
СДСМ, пак, веќе се подготвува за конгресот што ќе се одржи в понеделник попладне, кога ќе бидат утврдени конечните кандидатски листи на коалицијата што ја предводи владејачката партија. Откако кандидатските листи ќе ги поминат партиските филтри, тие треба да бидат доставени до ДИК најдоцна до 12 март (четврток) на полноќ.
Комбинаторики
Во партиските штабови деновиве се прават последните математики за тоа кои се најсоодветните профили за носители на листите во шест изборни единици во земјава. Мицкоски изјави дека привршуваат анализите во партијата и разговорите со коалициските партнери, и многу скоро би можело да се знаат имињата на носителите на листите. Од раководството на СДСМ, пак, најавуваат дека носителите на листи би требало да бидат утврдени в недела, односно ден пред конгресот.
Засега е извесно дека лидерот на СДСМ, Зоран Заев, се враќа како носител на листа во четвртата изборна единица, како што објави на неодамнешниот ТВ-дуел со Мицкоски, кога и го предизвика својот политички ривал да му биде директен противник на овие избори. Но, за разлика од Заев, кој е носител на листа на СДСМ во „четворката“ уште од парламентарните изборите во 2008 година, со исклучок на изборите 2014 година, до крај останува неизвесноста дали Мицкоски, на претстојните избори ќе го има првиот тест како кандидат за пратеник.
Актуелниот лидер на ВМРО-ДПМНЕ досега не бил носител на листа ниту, пак, кандидат за пратеник. Тој единствено беше носител на советничката листа за Скопје на локалните избори во 2017 година, по што поднесе оставка од советничкото место, оспорувајќи ја регуларноста на првиот изборен циклус по враќањето на СДСМ на власт, по десетгодишно владеење на ВМРО-ДПМНЕ. На ТВ-соочувањето со Заев, Мицкоски најави дека оваа седмица партијата ќе ги направи конечните анализи за тоа дали тој воопшто да биде кандидат и на овие избори или да ја води кампањата на ВМРО-ДПМНЕ само како кандидат за премиер.
Во 3 ИЕ дуел меѓу генералните секретари?
За разлика од втората и третата изборна единица, каде што најверојатно како носители на листи на ВМРО-ДПМНЕ се споменуваат партиските потпретседател и генерален секретар, Владо Мисајловски и Игор Јанушев, неизвесно е сè уште кој му биде директниот ривал на Заев во „четворката“. Освен ако Мицкоски не ја примени формулата на неговиот претходник Никола Груевски, кој во 2016 година направи „трансфер“ од првата во четвртата ИЕ, само за да му парира на Заев.
Од редовите на СДСМ, пак, како можен директен противник на Јанушев во „тројката“ се споменува генералниот секретар на СДСМ, Љупчо Николовски, кој беше носител на листата во овој регион и на претходните избори, на 11 декември 2016 година. Контра Мисајловски, во „двојката“ би можел повторно да „истрча“ Оливер Спасовски, за кого во СДСМ велат дека сè уште се прават анализи дали ќе може да се вложи со цел капацитет во кампањата, со оглед на тоа што ја извршува функцијата технички премиер.
Како можни носители на листи на СДСМ се споменуваат министерката за одбрана и заменик-претседателка на партијата Радмила Шекеринска, која на минатите избори беше во петтата ИЕ, како и министерот за надворешни работи Никола Димитров, за кого овие избори би биле први како кандидат за пратеник. Со оглед на новиот концепт што го најавува СДСМ за еднаква родова застапеност и на врвот на листите, не е исклучено Шекеринска – Димитров да биде двоецот во првата ИЕ. Од таборот на ВМРО-ДПМНЕ, пак, веќе подолго време како носител на листа во скопската ИЕ се спомнува Гордана Силјановска – Давкова, кандидатката за претседател на ланските избори.
Лидерите од албанскиот блок на мегдан во 6 ИЕ
Сепак, според неофицијални информации од ВМРО-ДПМНЕ, до крај останува отворена можноста Силјановска да одлучи да не се кандидира, барем не на чело на листата. Другата варијанта, пак, би била Силјановска да оди во „петката“, во чиј состав се Охрид и Кичево. Тогаш останува отворена можноста Мицкоски да оди во „единицата“ или евентуално тоа место да и припадне на разрешената министерка за труд и социјална политика Рашела Мизрахи, со оглед на засилените настапи на опозициската партија против Преспанскиот договор, што се очекува да доминира како тема и за време на кампањата.
Во игра за првите две места на листите на СДСМ се и министерот за здравство Венко Филипче и сегашната вицепремиерка Мила Царовска.
Во „шестката“ извесно е дека носител на листата на коалицијата на СДСМ ќе биде лидерот на Беса, Билал Касами, додека не е исклучено ВМРО-ДПМНЕ тука да настапи повторно со Владимир Ѓорчев. Во оваа изборна единица се очекува повторно да се кандидира како носител и лидерот на ДУИ, Али Ахмети. Извесна е кандидатурата како носител на листа во шестата ИЕ и на Зијадин Села од Алијансата за Албанците. Тоа го потврди денеска генералниот секретар на партијата Арбен Таравари, оценувајќи дека едно е сигурно – дека во шестата ИЕ Зијадин Села ќе го победи Али Ахмети. Тој најави дека Алијансата, која на овие избори оди во коалиција со Алтернатива на Африм Гаши, ќе ги претстави своите кандидатски листи на 11 овој месец, односно истиот ден кога ќе бидат промовирани и листите на ВМРО-ДПМНЕ – ден пред истекот на рокот за доставување на кандидатурите во ДИК.