Вкупен износ за ваквиот договор изнесува 29 033 405 денари, за кои требало да спроведе јавна набавка според законот. Поточно, на одредени фирми им исплаќал милионски суми без спроведување на јавна набавка. За да биде неговото самоволие поголемо, истиот исплаќал милиони на негови блиски од добиени дотации од министерства
СДСМ му поднесе кривична пријава на градоначалникот на Шуто Оризари Курто Дудуш до Обвинителството за гонење на организиран криминал и корупција (ОЈО-ГОКК) за сторено кривично дело злоупотреба на службената положба и овласување по член 353 од КЗ, информира денеска на прес-конференција претседателот на ОО СДСМ Шуто Оризари, Асан Ферат.
„Поминаа две години од локалната власт во Шуто Оризари. Освен корупција, криминал, узурпација на државно земјиште, насилство и фалење со проекти од централната власт на СДСМ, злосторничкото дуо Курто и Фата ништо друго не знаат да прават. Меѓутоа, знаат да возат скапи автомобили, да имаат приватна зоолошка градина, да купуваат скапи телефони со парите на граѓаните. На ден 20 ноември 2023 година, поднесена е кривична пријава против Курто Дудуш до ОЈО за гонење на организиран криминал и корупција за сторено кривично дело Злоупотреба на службената положба и овласување по член 353 од КЗ“,
изјави Ферат.
Како што посочи Ферат, Дудуш, во својство на градоначалник на општина Шуто Оризари, во период од 2020 година до денес, со намера противправно да се стекне со имотна корист и да нанесе штета на буџетот на општина Шуто Оризари, спротивно на член 40 од Законот за јавни набавки, вршел плаќање кон различни правни субјекти без да спроведе јавна набавка.
„Вкупен износ за ваквиот договор изнесува 29 033 405 денари, за кои требало да спроведе јавна набавка според законот. Поточно, на одредени фирми им исплаќал милионски суми без спроведување на јавна набавка. За да биде неговото самоволие поголемо, истиот исплаќал милиони на негови блиски од добиени дотации од министерства“,
изјави Ферат.
Тој ги повика Јавното обвинителство и сите надлежни институции „заедно да застанат и да стават крај на ова злосторничко дуо“.