Во градоначалничката трка влегуваат двајца пратеници, Костадинов и Черикчиев во Радовиш, додека во Долнени кандидат е Аднан Џафероски, поранешен директор на Дирекцијата за заштита и спасување
СДСМ на овие избори ќе оди со нови кандидати за градоначалници на Куманово, скопски Центар, Битола, Струмица, Крива Паланка… општини во кои досегашните градоначалници не добија шанса од својата партија за нов мандат.
Генералниот секретар на партијата Љупчо Николовски, на прес-конференција попладнево соопшти дека се утврдени уште 18 кандидатури за градоначалници, така што останува да се објави само уште кандидатот на СДСМ за градоначалник на Кочани. Името, на последниот кандидат, како што најави, ќе се знае на 8 септември.
Шанса за нов мандат добија досегашниот градоначалник на скопската општина Ѓорче Петров, Александар Наумовски, како и градоначалниците на Гевгелија и на Македонска Каменица, Сашко Поцков и Соња Стаменковска.
Во Струмица, кандидат на СДСМ ќе биде пратеникот и портпарол на партијата Костадин Костадинов, наместо Коста Јаневски. И во Радовиш СДСМ оди на изборите со актуелен пратеник – Коле Черикчиев, наместо досегашниот градоначалник Герасим Конзулов. Во Долнени, пак, кандидат за градоначалник е Аднан Џафероски, поранешен директор на Дирекцијата за заштита и спасување.
Во Куманово, кандидат ќе биде Оливер Илиевски, директор на тамошното ЈП „Водостопанство“ и секретар на општинската организација на СДСМ. Николовски рече денеска дека актуелниот градоначалник на Куманово Максим Дикитриевски сам се исклучил од СДСМ со независната кандидатура и дека владејачката партија има само еден кандидат во оваа општина.
Во Центар, претседателот на општинската организација, Горан Герасимовски, ќе биде кандидат на СДСМ на овие избори, наместо досегашниот градоначалник Саша Богдановиќ.
Во Битола, кандидат е Христо Кондовски, бизнисмен, наместо Наташа Петровска, досегашната градоначалничка.
Наместо досегашниот градоначалник Борјанчо Мицевски, нов кандидат на СДСМ за градоначалник на Крива Паланка е Сашко Митовски, бизнисмен.
Во Македонска Каменица нова кандидатура доби актуелната градоначалничка Соња Стаменковска.
Асан Ферат, претседател на општинската организација на СДСМ во Шуто Оризари е кандидат за градоначалник на оваа општина.
Во Кривогаштани кандидат е Николче Мисовски, а во Струга Димче Шипинкаровски.
Игор Крцковски е кандидат во Дебарца, Сашко Комненовиќ – Чучер Сандево, а во Врапчиште Џезми Мамути.
Во Македонски Брод, СДСМ оди со сегашниот градоначалник Живко Силјановски.
За преостанатите десетина општини (Дебар, Чаир, Сарај…) Николовски рече дека СДСМ нема кандидати, затоа што ќе поддржи кандидат на коалициските партнери. Во сите 80 општини плус градот Скопје, СДСМ ќе има свои листи за советници.