Опозицијата и денеска ги повтори обвинувањата дека во периодот од 17 до 20 март, откако беше прогласена вонредна состојба во земјава, Владата потрошила осум милиони денари за репрезентација, услуги во ресторани и патувања
Не поминува лагата на ВМРО-ДПМНЕ дека министрите за надворешни работи и за одбрана патувале во време на пандемија, прогласена вонредна состојба и затворени аеродроми, реагираа денеска од СДСМ откако опозицијата и денеска настапи со истите тврдења дека од 17 до 20 март Владата потрошила осум милиони денари за репрезентација, услуги во ресторани и за патувања.
Од СДСМ ги потврдуваат информациите на шефот на дипломатијата дека во последните повеќе од 20 дена никој од МНР не патувал во странство.
„Чиста лага се тврдењата на ВМРО-ДПМНЕ дека во период на криза МНР трошело за патувања во странство. Министерот за надворешни работи Никола Димитров во март немал ниту едно патување, а последното патување на дипломат од МНР во странство било на 3 март“,
се наведува во соопштение на СДСМ.
Од СДСМ велат дека ВМРО-ДПМНЕ шири лажни вести и конструкции, посочувајќи на претходно реализирани авиокарти на дипломати од МНР во износ помал од 1 500 евра (91 060 денари) и на редовна месечна дознака за патни трошоци на нашите амбасади низ светот, на сите 57 дипломатско-конзуларни претставништва на Северна Македонија во износ од приближно 22 000 евра (1 366 457 денари) односно нешто под 400 евра по ДКП.
се наведува во соопштението на СДСМ.
„Станува збор за редовна активност и токму затоа згрозува фактот дека се злоупотребува од луѓе кои разбираат, кои точно знаат за што се работи, но сепак одлучиле да манипулираат и да лажат и тоа во време кога МНР е една од клучните алки во борбата против коронавирусот. Ниту шлаканицата што ја добија од ОН кои јавно ги демантираа лажните вести на Александар Николовски, не ги спречи да продолжат да се однесуваат неодговорно и да работат на штета на државата. Обидувајќи се да го минимизираат успехот на нашата земја, изминатите два дена ги таргетираа двете министерства клучни во макотрпната работа за нашата земја да стане членка на НАТО и да добие датум за почеток на пристапни преговори во ЕУ. Откако увидоа дека лагата со патување на министрите за одбрана и за надворешни работи во време на пандемијата и затворен аеродром не им проаѓа, наместо да запрат, искористија други конструкции,“
Од владејачката партија посочуваат дека владата предводена од СДСМ јавно ги објавува сите трошоци на министрите, за разлика од нивната влада која ги направи класифицирани информации. Владината алатка за отчетност и транспарентност, велат од СДСМ, ќе покаже и дека министерката за одбрана Радмила Шекеринска за две и пол години потрошила 6 пати помалку од претходниот министер Зоран Јолевски за ист толкав период.
Од ВМРО-ДПМНЕ и денеска излегоа со обвинувања дека владата за само четири дена, во период на прогласена вонредна состојба, поточно од 17 до 20 март потрошила осум милиони денари за репрезентации, услуги во ресторани и патувања.
„За само четири дена, во екот на заразата, кога стотици граѓани биле заразени и побарале здравствена заштита, кога нема доволно ресурси во здравствениот систем, биле потрошени 3 078 300 денари на име на репрезентации од страна на функционерите на власта. Функционерите на СДСМ изеле и испиле над три милиони денари во време кога ни се случува најголемата здравствена и економска криза. Дополнително не се штедело ниту на трошоци на патувања во земјава и странство. Потрошени се 96 843 евра за патни трошоци, сместувања, хранарина и дневници“,
велат од ВМРО-ДПМНЕ.
Затоа од ВМРО-ДПМНЕ велат дека, наместо кратење на плати на работниците и на администрацијата, министрите треба да се откажат од платите и да ги донираат за борбата против коронавирусот