Коалицијата, како што наведуваат од СДСМ, е целосно посветена на европскиот пат со јасен план за европски животен стандард, просперитетна и развиена држава, во која функционираат демократијата, владеењето на правото и социјалната правда
Лидерот на СДСМ, Димитар Ковачевски, денеска во седиштето на партијата на Бихаќска го потпиша коалицискиот договор со 13 политички партии со што и формално, како што соопштија попладнево од партијата, е формирана предизборната коалиција која го носи името „Коалиција за европска иднина“.
Најголем дел од партиите со кои СДСМ заедно ќе ја бара поддршката на граѓаните на парламентарните избори закажани за 8 мај и досега беа во политички сојуз со Социјалдемократите.
Коалицискиот договор го потпишаа СДСМ, НСДП, ЛДП, Партијата за движење на Турците, Партијата на пензионери, ДОМ, ВМРО народна партија, Демократски сојуз на Власите во Македонија, ПОЕН, Сојуз на Ромите во Македонија, Десница, Партија за демократски просперитет на Ромите, СДА, а кон коалицискиот договор, додаваат од партијата, се приклучило и Движењето нова република.
„Коалицијата за европска иднина“, како што наведуваат од СДСМ, е целосно посветена на европскиот пат со јасен план за европски животен стандард, просперитетна и развиена држава, во која функционира демократијата, владеењето на правото и социјалната правда.
„Коалицијата се залага за европски животен стандард за граѓаните, економски раст и развој преку директни вложувања и странски инвестиции, преку капитални и инфраструктурни инвестиции, но и преку поддршка на домашните компании, како и за достоинствен живот за пензионерите како основни постулати на предизборните активности и кампањи“,
се вели во соопштението.
Од СДСМ се уверени дека нивната проевропска коалиција ќе ја формира идната влада по избори и ќе биде предводник во реформските процеси. Ќе се залага за завршување на преговорите со Европската Унија до 2028 година и членство до 2030 година, наспроти нови 11 години изолација и заглавување, кои како што велат од Бихаќска ги нуди опозицијата.
На 28. конгрес на СДСМ што се одржа во саботата партијата ги потврди листите за пратеници и нивните носители. Во првата изборна единица, како што и досега беше познато, листата ќе ја предводи партискиот лидер Димитар Ковачевски, а на позицијата коносител на листа ќе биде претседателката на коалициската Либерално-демократска партија, Моника Зајкова. Изборната единица 2 ќе ја предводи ексминистерот за внатрешни работи Оливер Спасовски, а коносител ќе биде партискиот потпретседател и актуелен вицепремиер за економски прашања Фатмир Битиќи.
Носителка на листата за пратеници во третата изборна единица ќе биде заменик-претседателката на СДСМ и директорка на Управата за јавни приходи (УЈП), Сања Лукаревска, а Љупчо Николовски, кој е актуелен министер за земјоделство, ќе биде коносител во „тројката“. Листата во „четворката“ ќе ја предводи поранешниот министер за здравство Венко Филипче, а коносителка во оваа изборна единица ќе биде поранешната министерка и актуелна дополнителна заменик-министерка за труд и социјална политика Јованка Тренчевска.
Носител во петтата изборна единица ќе биде актуелниот собраниски спикер Јован Митрески, а на позицијата коносител во „петката“ ќе биде министерката за култура Бисера Костадиновска-Стојческа. Пратеничката листа на СДСМ во изборната единица 6 ќе ја предводи претседателката на Централниот одбор на партијата и актуелна министерка за одбрана Славјанка Петровска, а коносител ќе биде Агрон Демири.
Деновиве и кај другите политички партии кои ќе се борат за влез или за пратеничко столче плус во Собранието актуелни се формирањата на предизборни коалиции, а такви веќе формираа и ги прошируваат ДУИ, опозициските партии на Албанците и ГРОМ на Стевчо Јакимовски.