Вчеравечер премиерот и лидер на СДСМ, Димитар Ковачевски, од партиска трибина во Куманово го повика лидерот на опозициската ВМРО-ДПМНЕ, Христијан Мицкоски, да одговори дали бара од странски и домашни политичари да му помогнат да дојде на власт, а кога тоа ќе се случи ќе го смени Уставот. Пратеникот и член на Извршниот комитет на ВМРО-ДПМНЕ утрово на својот фејсбук-профил му одговори на премиерот Ковачевски дека е лага дека некој барал власт од странците
Социјалдемократскиот сојуз на македонија (СДСМ денеска го повика лидерот на опозициската, ВМРО-ДПМНЕ, Христијан Мицкоски, „да не се крие“ зад партискиот колега Драган Ковачки и самиот да одговори на јавно поставеното прашање дали на средби со странски и домашни политичари барал помош од нив за да дојде на власт, а во замена нудел промена на Уставот.
„Христијан Мицкоски во заложништво на Димитар Апасиев, нема храброст да одговори на јавно поставени прашања, па затоа нарачува одговори од неговите извршители како што е дезертерот Драган Ковачки. Мицкоски да не се крие зад Ковачки и да одговори на директно поставените прашања: Дали на средби со домашни и странски политичари им велел дајте ми власт и ќе го сменам Уставот? Од кого се барал власт Мицкоски за да го смени Уставот? Познато е лицемерието на Мицкоски за државните и националните интереси кога во јавност зборува едно, а зад затворени врати сосема друго“,
се вели во соопштението на СДСМ.
Оттаму додаваат дека Мицкоски е „слаб, уплашен и очаен, затоа се што прави, прави за да не заостане зад Апасиев“.
Вчера вечер премиерот и лидер на СДСМ, Димитар Ковачевски од партиска трибина во Куманово го повика лидерот на опозициската ВМРО-ДПМНЕ, Христијан Мицкоски, да одговори дали бара од странски и домашни политичари да му помогнат да дојде на власт, а кога тоа ќе се случи ќе го смени Уставот.
„Дали на странските политичари кои доаѓаат во Северна Македонија, вклучително и на домашните политичари, на состаноците кои ги има со нив им вели: Дајте ми власт и ќе го сменам Уставот. Нека одговори, па нека чујат и странците и нашите граѓани… Еднаш на аеродром му велиш на (поранешниот н.з.) бугарски премиер Бојко Борисов го поддржувам Договорот со Бугарија, еднаш на Кирил Петков (поранешен премиер н.з.) му вели да ќе поддржи уставни измени, а потоа на пратениците им вели донесете нотарски изјави дека нема да гласате за уставни измени. Потоа излегува и вели дека ако Европа ни даде гаранции ќе поддржам уставни измени. Тоа ли е човек со став“,
рече Ковачевски во своето обраќање на партиската трибина „Силно и одлучно кон иднината“ што вчера вечер се одржа во Куманово.
Пратеникот и член на Извршниот комитет на ВМРО-ДПМНЕ утрово на својот фејсбук-профил му одговори на премиерот Ковачевски дека е лага дека некој барал власт од странците.
„Лагата дека некој барал власт од странците не поминува, власт дава и зема народот на Македонија. Димитар Ковачевски, човекот кој се крие зад Цаци, поставен да одработи на штета на македонскиот народ и на Македонија, не знае дека народот е тој што избира и дава и народот е тој што зема на избори, а не странските политичари“,
напиша Ковачки додавајќи дека лаги како оваа не поминуваат.