За денеска е најавен протест на членовите на Конфедерацијата на слободни синдикати, кои ќе продолжат со изразување незадоволство до исполнување на барањата, а за утре штрајк е најавен и од вработените во Управата за водење матични книги
Владејачката партија СДСМ денеска ги повика сите синдикати кои најавија штрајкови и протести да се се вратат на преговори истакнувајќи дека Владата има слух за нивните барања.
„Како што и многупати досега истакнавме правото на штрајк и на протести загарантирано право со Уставот, но секогаш треба предност да му дадеме на социјалниот дијалог особено кога гледаме дека Владата има слух за социјален дијалог. Веќе имаше една одржана средба со репрезентативниот синдикат во јавниот сектор и тој социјален дијалог за усогласување на платите во целиот јавен сектор и враќање на некои права што веќе со години не се практицираат како што е К-15 за јавниот сектор и подготовка на нов општ колективен договор во јавниот сектор веќе започнува. Затоа апелираме повторно сите синдикати да се вратат на преговарачките маси, и повторуваме дека Владата има слух и дека зголемување и раст на платите ќе има“,
изјави денеска пратеничката Санела Шкријељ одговарајќи на новинарско прашање за серијата штрајкови и протести што од денеска се најавуваат во земјава.
Од денеска на протест излегува и Конфедерацијата на слободни синдикати (КСС) со барање за усогласување на платите во јавниот сектор со минималната плата. Како што е најавено, тие пред Владата и Собранието ќе протестираат од 16 до 17 часот.
По вчерашниот начелен договор меѓу Владата и СОНК за зголемување на платите во училиштата и градинките за 12 отсто, денеска треба да биде донесена конечна одлука за прекин на штрајкот во образованието. Одлуката ќе биде донесена по консултациите што раководството на СОНК треба да ги направи со членството по што од утре се очекува учениците повторно да се вратат во училишните клупи по двонеделен прекин.
Од утре (од 8 часот) ќе штрајкуваат вработените во Управата за водење матични книги, објави Независниот синдикат на оваа институција. Во најавата се вели дека сè додека трае штрајкот нема да се издаваат изводи од матичната книга на родени, венчани и умрени.