Од партијата велат дека чекорите кои биле договорени на денешниот состанок на раководството ќе бидат ефектуирани од наредната недела
Раководството на СДСМ денеска имало состанок на кој претседателот во оставка, Зоран Заев, информирал за консултациите и разговорите со коалициските партнери. Како што велат, партијата се реорганизира и денеска се утврдени следните чекори, но за нив ќе информираат следната недела.
„Заедно со претседателот Зоран Заев, раководството работи на решенија и одлуки со кои СДСМ се реорганизира со единствена цел да продолжи да му служи на својот народ на највисоко можно ниво и секако да биде водечка партија во парламентарното мнозинство кое го одржува реформскиот и прогресивен курс на земјата. На денешниот состанок на раководството се утврдија следните чекори на партијата кои од наредната недела ќе бидат ефектуирани, за што јавноста, граѓаните, ќе бидат информирани“,
соопштија од СДСМ.
Од партијата појаснуваат и дека со оставката на Заев во оставка е и целото раководство на СДСМ.
Исто така, потсетуваат дека актуелните партнери во власта потврдиле дека мнозинството е стабилно и оти е потребна влада која ќе се справи со кризите.
„Парламентарното мнозинство е одговорно кон иднината на државата и народот и во оваа насока се разговорите со сите коалициски партнери од парламентарното мнозинство. Претставниците на сите партии од парламентарното мнозинство потврдија дека мнозинството во Собранието е стабилно и изразија поддршка на влада од оваа парламентарно мнозинство. На Северна Македонија и е потребна Влада која испорачува резултати од интерес на граѓаните посебно во време на пандемијата и енергетска криза со јасен евроатлантски курс на дејствување“,
велат од СДСМ.