Буџетот за 2023 година е развоен и е одговор на последиците од светската економска криза, велат од владејачкиот СДСМ откако Владата го усвои Буџетот и тој сега е во собраниска процедура.
„Буџетот е со цел конечно да ја победиме кризата, да почнеме економски да растеме, да го зголемиме животниот стандард на сите наши граѓани. Следната година мора да биде и ќе биде подобра од оваа. Следната година е година на надеж и на економска пресвртница. Таа пресвртница започнува токму со овој Буџет со кој обезбедуваме 250 милиони евра за дополнителни мерки за помош на граѓаните. Пари се обезбедени и за нов раст на минималната плата и за пензиите“,
изјави пратеничката од СДСМ, Даниела Николова.
Според партијата, околу 800 милиони евра се предвидени за капитални проекти, за нови улици и патишта, за нови водоводи, за нови градинки и училишта, за нови амбуланти и болници.
„Тоа дополнително ќе го поттикне генералниот економски раст кој според проекциите на ЕБОР треба да биде на ниво на 2,3 отсто што ќе биде многу подобро од нивото на државите од еврозоната. Во овие десет месеци ја држевме цврсто економската линијата за борба против кризата, но веќе од следната година со новиот Буџет правиме економска офанзива“,
додаде Николова.
Од СДСМ велат дека прават општествена промена преку енергетската транзиција, нови странски директни инвестиции и силна поддршка за граѓаните и домашната економија.