Со мудри, трпеливи и државнички одлуки СДСМ ја донесе Република Северна Македонија во нова ера, ново европско поглавје од македонската историја. Поглавје во кое со затворени прашања со сите соседи може да продолжиме кон Европската унија, по патот на развојот и напредокот
Претседателот на Владата на Република Северна Македонија и лидер на СДСМ Димитар Ковачевски, денес, по повод Денот на независноста – 8 Септември, беше и на традиционалниот народен пикник на Пеленица во околината на Скопје.
Од таму Ковачевски рече дека е гордост токму на Денот на независноста, како претседател да зборува за патот на македонската државност, за европската иднина, но и за придонесот на СДСМ.
„Ако погледнеме наназад во изминатите 31 година, заклучокот е тој. Секогаш кога и било тешко на Македонија СДСМ била тука, водела напред и секогаш била на вистинската страна. Од процесот на создавање независна држава, меѓународно признавање, преку кандидатски статус, решавање на споровите со соседите и реализирање на стратешката цел, членство во НАТО, па се до почетокот на преговори со ЕУ оваа година. И затоа денеска после 31 година со гордост можам да кажам: Како што нашите предци во НОБ биле на вистинската страна, СДСМ била и се уште е на вистинската страна на македонската современа историја. Денеска тоа е европската иднина на земјата, на сите наши граѓани“,
рече Ковачевски.
Конечно, додаде тој, после 17 години во чекалницата, успеавме и го направивме клучниот чекор од нашата последна етапа во евро-интеграциите. Започнавме преговори со ЕУ за полноправно членство, со чист македонски јазик, со сочуван македонски идентитет и посебност.
„Со мудри, трпеливи и државнички одлуки СДСМ ја донесе Република Северна Македонија во нова ера, ново европско поглавје од македонската историја. Поглавје во кое со затворени прашања со сите соседи може да продолжиме кон Европската унија, по патот на развојот и напредокот“,
нагласи премиерот Ковачевски.
Ковачевски рече дека во политиката со интересот на граѓаните нема да калкулира и дека од тоа не отстапува.
„Ние мора да ја покажеме и ја покажавме разликата помеѓу нас и нашиот опонент. А разликата е голема и видлива. СДСМ е државничка партија која води напред и го гледа државниот интерес, ВМРО-ДПМНЕ е парија која само ги гледа своите тесно партиски интереси.СДСМ е партија која води кон иднината, ВМРО-ДПМНЕ се плаши од иднината, тие водат единствено назад кон времиња на несигурност, бесперспективност, блокади и деструкции“,
додаде Ковачевски.
Премиерот потенцираше дека ќе продолжат по европскиот пат и веќе ништо не може да го спречи развојот.
„Северна Македонија до 2030 ќе биде членка на ЕУ а до тогаш ќе се развива, реформира и унапредува во секоја пора од општеството. Европеизација значи подобри закони, праведна држава, посилна економија и развој. Нема да дозволиме да запреме сега кога сме на чекор од реализација на стратешките цели. СДСМ останува на своите принципи и државнички постулати. Продолжуваме со грижа за сите, со поддршка во време на криза, со инвестиции“,
нагласи Ковачевски.