Од СДСМ бараат Владата да го објави списокот на сите членови на делегацијата кои патувале на државен трошок за, како што велат, да се потврди или отфрли оваа информација
На овој повик на СДСМ одговор не стигна од премиерот, туку од неговата партија ВМРО-ДПМНЕ, од каде што велат дека синот на Мицкоски не бил дел од официјалната делегација и дека сите трошоци се подмирени приватно од семејството на премиерот
Фотографија од посетата на премиерот Христијан Мицкоски на Вашингтон, на која се гледа дека со него е и неговиот постар син, денеска е тема на партиски преписки.
Од Социјалдемократскиот сојуз (СДСМ) го повикаа премиерот Христијан Мицкоски да каже дали на државен трошок во САД го носел и синот. На овој повик на СДСМ одговор не стигна од премиерот, туку од неговата партија ВМРО-ДПМНЕ, од каде што велат дека синот на Мицкоски не бил дел од официјалната делегација и дека сите трошоци се подмирени приватно од семејството на премиерот.
Од СДСМ во соопштението го повикуваат Мицкоски да се произнесе за целата ситуација.
„Универзитетот ‘Џонс Хопкинс’ на официјалниот профил на Икс објави фотографии од посетата на Мицкоски од САД каде што, според информациите од медиумите, со него е неговиот постар син. Мицкоски мора итно да ја информира јавноста дали го носел синот во САД на државен трошок и да се произнесе околу целата ситуација. Мицкоски кој од самиот универзитет порача дека правото и правната држава за него се приоритет, очигледно решил тоа да важи за сите освен за него“,
се наведува во соопштението од СДСМ.
Од СДСМ бараат Владата да го објави списокот на сите членови на делегацијата кои патувале на државен трошок за, како што велат, да се потврди или отфрли оваа информација.
„Изјава на Мицкоски нема да биде доволна. Владата најави отвореност и транспарентност, сега е шанса да го покаже тоа“,
се додава во соопштението од СДСМ.
Реакција за фотографијата прво стигна од поранешната министерка за одбрана и актуелна пратеничка Славјанка Петровска која во објава на својот фејсбук-профил напиша дека владата на првото патување го има и првиот скандал.
„Прво владино патување, прв скандал! Асистенотот на татко му, а сега премиер, си го зел синот во делегација во САД! Ова младо дете на фотографијата не е најдобриот студент во Македонија. Не е ниту стипендист на државата. Не е учесник на некој конкурс или јавен повик за студенти, па како награда да биде дел од државната делегација предводена од премиерот Мицкоски. Се прашувате кој е? Синот на Христијан Мицкоски“,
пишува во објавата на Петровска.
Таа додава дека првото официјално владино патување Мицкоски го претворил во семејно патување.
„Не чудете се, Мицкоски напредуваше во кариерата како асистент на сопствениот татко“,
додава таа.
На прашањата од СДСМ стигна писмена реакција од партијата на Христијан Мицкоски, ВМРО-ДПМНЕ, од каде што велат дека патувањето на синот на Мицкоски не ја чини државата ништо.
„Синот на Мицкоски не е дел од официјалната делегација во НАТО-самитот. Иако претседателот Мицкоски има право на придружен член на делегација, патувањето на неговиот син државата не ја чини ништо, односно сите трошоци се подмирени приватно од семејството на Мицкоски. За разлика од времето кога премиерот на СДС, Ковачевски, ги донесе децата како членови на официјална делегација. Ако делегацијата сакала да сокрие нешто, сигурно немаше да има фотографии. Напротив, сè е транспарентно“,
се вели во реакцијата од ВМРО-ДПМНЕ.
Оттаму во соопштението ги посочуваат ефектите од патувањето на претседателот на Владата, за кои велат дека се повеќе од очигледни, посочувајќи на 20 средби со лидери на држави членки на НАТО, две инвестициски одлуки и специјалната економска соработка со Унгарија од 500 милиони евра.
По соопштението од ВМРО-ДПМНЕ, од опозициската СДСМ повторно реагираа и побараа Мицкоски, доколку тврди дека приватно го платил патувањето и сместувањето на синот, да ги објави јавно тие сметки, но и Владата транспарентно да ја објави листата од сите што патувале на државен трошок.
„Ова е најмалку што може да направи Мицкоски бидејќи за граѓаните е крајно симптоматично што самиот Мицкоски не објави ниту една фотографија од ова патување со синот, туку тоа случајно медиумите и граѓаните го дознаа од објавата на Универзитетот ‘Џонс Хопкинс““,
пишуваат од СДСМ.
Околу фотографијата и патувањето на синот на премиерот Христијан Мицкоски во Вашингтон, „360 степени“ побара одговори од Владата. Прашањата што ги упативме се дали синот на премиерот Мицкоски патува со него во САД, кој ги покрива трошоците за неговото патување и по која основа тој е со владината делегација.
До објавувањето на овој текст, од Владата не добивме одговори на прашањата.
Минатата година тогашниот премиер Димитар Ковачевски на патување во САД беше придружуван од сопругата и двете деца. Ковачевски тогаш рече дека трошоците за патувањето на неговите деца не биле на товар на државниот буџет и додаде дека е подготвен да поднесе и копии од сметките. За сопругата рече дека го придружува на патувањата за кои има покана, а таков бил случајот со посетата на САД.