Поранешната дополнителна заменик-министерка за труд и социјална политика, инаку шефица на кабинетот на Царовска, е следна жена на листата на СДСМ во втората ИЕ
Две нови пратенички од листата на СДСМ ќе влезат во Собранието по изборот на новата влада на Димитар Ковачевски во која од парламентот се „селат“ Славјанка Петровска, која ќе биде министерка за одбрана и Бисера Костадиновска Стојчевска, идната министерка за култура.
Една од идните пратенички е Санела Шкриељ која беше дополнителна заменик-министерка за труд и социјална политика во преодната влада пред парламентарните избори во 2020 година. Таа влегува во парламентот како следна, односно 14-та на листата на СДСМ во втората изборна единица, која на тогашните избори ја предводеше Оливер Спасовски, кој, пак, тогаш беше технички премиер. Кандидатот пред Шкриељ, Зоран Павловски, практично, ќе биде прескокнат, затоа што, според Изборниот законик, на местото на пратеничка влегува следната жена од листата.
Шкриељ, инаку е шефица на кабинетот на досегашната министерка за образование Мила Царовска, а претходно беше и шефица на нејзиниот кабинет во МТСП – позиција од која и стана преодна заменик-министерка во овој ресор, кога за техничка министерка од опозициската ВМРО-ДПМНЕ беше номинирана Рашела Мизрахи, која потоа беше разрешена од функцијата.
Во преодната влада на Спасовски, идната министерка за одбрана, Славјанка Петровска, пак, беше дополнителна заменик-министерка за внатрешни работи, кога технички министер од ВМРО-ДПМНЕ беше Наќе Чулев.
Од петтата изборна единица следна жена на листата е Марија Кочовска од Демир Хисар, која би влегла во парламентот на местото на Костадиновска-Стојчевска. Идната министерка за култура, која е од Битола, беше треторангирана на листата на СДСМ во петтата ИЕ, чија носителка на изборите во 2020 година беше досегашната министерка за одбрана Радмила Шекеринска.
Во ноември минатата година во Собранието влегоа шест нови пратеници, на местата на новоизбраните градоначалници на локалните избори што се одржаа во октомври.