За погребот на Бенедикт, Ватикан ги покани само Италија и Германија да испратат официјални делегации и ги советуваше странските амбасади дека сите други лидери кои сакаат да присуствуваат можат да го сторат тоа, но само во „приватно својство“, пишува АП
Смртта на пензионираниот почесен папа Бенедикт Шеснаесетти, која го одбележа последниот ден од 2022 година, се случи значително поинаку отколку што беше случај со сите претходни папи.
Ѕвоната на базиликата Свети Петар, како и на другите цркви ширум светот, останаа неми, а информацијата за неговата смрт ја соопшти информативната канцеларија на Ватикан со кратко соопштение и објави на социјалните мрежи. Погребот на почесниот папа Бенедикт Шеснаесетти, кој ќе биде едноставен и без многу помпа по тридневното збогување со верниците, ќе се одржи во четврток наутро на плоштадот Свети Петар во Ватикан. Според информациите до кои дојде Асошиејтед прес (АП), бројот на делегации и верници присутни на погребот нема да биде ни блиску до оној од 8 април 2005 година, кога беше погребан папата Јован Павле Втори.
„За погребот на Бенедикт, Ватикан ги покани само Италија и Германија да испратат официјални делегации и ги советуваше странските амбасади дека сите други лидери кои сакаат да присуствуваат можат да го сторат тоа, но само во ‘приватно својство’. Италијанските безбедносни претставници проценуваат дека околу 60 000 луѓе би можеле да присуствуваат на погребот, само мал дел од 300 000 колку што беа наредени на плоштадот и околните улици во 2005 година“,
пишува АП.
Актуелниот поглавар на Римокатоличката црква, кој за три месеци ќе наврши десет години на чело на црквата, зборуваше и за својот претходник во Ватикан. Папата Франциск во суперлативи зборуваше за Бенедикт Шеснаесетти, а според информациите од Ватикан, тој бил првиот службеник кој пристигнал во манастирот каде во саботата наутро во 9 часот и 34 минути починал поранешниот кардинал Рацингер.
„Почетокот на новата година и е доверен на Света Марија, која денес ја славиме како Богородица. Во овој момент, да се повикаме на нејзиното застапништво, особено за почесниот папа Бенедикт Шеснаесетти, кој вчера наутро го напушти овој свет. Сите заедно, со едно срце и една душа, да му се заблагодариме на Бога за дарот на овој верен слуга на Евангелието и на Црквата“,
рече папата Франциск.
АП, исто така, наведува дека со смртта на почесниот папа, ќе бидат отстранети сите пречки за официјално да се регулираат протоколите на Ватикан за слични ситуации во иднина, бидејќи такви не постоеле порано бидејќи Бенедикт Шеснаесетти е првиот папа во речиси 600 години кој поднел оставка од оваа функција.
Погребот на почесниот папа Бенедикт Шеснаесетти ќе остане запишан во историјата на црквата, но и на светот, како досега уникатен настан, бидејќи еден папа ќе ги води мисата и погребот на друг папа, односно неговиот претходник. Според желбата на почесниот папа, по мисата неговото тело ќе биде положено во криптата под базиликата Свети Петар во гробот каде што беше положено телото на свети Јован Павле Втори до моментот кога тој беше прогласен за светец и пренесен во олтарот на свети Себастијан.