Тој потврди дека бил повикан во полициска станица во врска со случајот, но вели дека не се заканувал, туку дека преку социјалните мрежи поставил прашања во врска со измените на Законот за облигациони односи за кои Уставниот суд пред неколку дена одлучи да поведе постапка и донесе времена мерка за извршување на оспорените законски одредби
Претседателот на Партијата за целосна еманципација на Ромите (ПЦЕР), Самка Ибраимоски, за кого дел од медиумите вчера објавија дека преку социјалните мрежи им се заканувал на судии од Уставниот суд, негира дека се работи за какви било закани упатени кон кого било.
Тој потврди дека бил повикан во полициска станица во врска со случајот, но вели дека не се заканувал, туку дека преку социјалните мрежи поставил прашања во врска со измените на Законот за облигациони односи за кои Уставниот суд пред неколку дена одлучи да поведе постапка и донесе времена мерка за извршување на оспорените законски одредби.
„Јас поставив само едно прашање – што ако настанат убиства? Го пренесов гласот на народот она што ми пишуваат мене во инбокс, каде што кажуваат: ‘ќе земам пиштол’ и ‘ќе отепам некого’ или ‘јас ќе се отепам’. Тоа е мое едно поставено прашање, кој ќе одговара за настанати убиства ако се случат, никакви посебни закани не сум имал кон судиите. Не сум им се заканил ниту на Ана Павловска-Данева ниту на претседателот на судот“,
рече Ибраимоски на денешната прес-конференција.
Главниот проблем во врска со постапувањето на Уставниот суд во однос на измените на Законот за облигациони односи, според Ибраимоски, е тоа што Судот првично ја одбил, а потоа повторно ја зема за преиспитување законитоста и уставноста на измените на Законот за облигациски односи.
„Претседателот на Судот гласаше во првиот состав кога се одлучуваше за овој закон. Сега во второто прегласување тој гласаше против својата самостојна одлука. Дали нешто не е во ред и дали има индиции тоа треба да се позанимава јавниот обвинител затоа што овој закон е спас за народот што не се почитува веќе една година и има правосилни пресуди добиени што не ги почитуваат извршителите. Ова е една голема игра меѓу извршителите, олигарсите, судиите“,
вели Ибраимоски.
Дали со ваквото постапување, додава Ибраимоски, Уставниот суд се става во позиција на Собрание, Влада и „како што се менуваат уставните судии така ќе се менуваат и стратегиите на Судот, па ќе се менуваат закони“.
„Сите мои реакции овој изминат период се токму поради гласините дека големите бизнис и банкарски олигарси вршат притисок за овие измени да не профункционираат, заради тоа што директно засегаат во нивниот интерес, а за сметка на граѓаните“,
додава тој.
МВР вчера објави дека лице со иницијали С.И. ги испраќало заканите до уставни судии за кои претседателот на Уставниот суд, Дарко Костадиновски, претходно вчера поднесе пријава до полиција. Директно упатените закани до судии, информираа вчера од Уставен, се поврзани со постапување по конкретен предмет од страна на Судот.