Демократската партија на САД поради пандемијата од коронавирусот ја одложи за август партиската конвенција на која формално се избира нивниот претседателски кандидат за изборите во ноември.
Конвенцијата првично беше закажана за 16 и 17 јули во Милвоки, во сојузната држава Висконсин, а сега е презакажана за 17 август.
„Во услови на неизвесност, веруваме дека најпаметниот пристап е да се издвои дополнително време за следење на ситуацијата, за да можеме најдобро да ја подготвиме партијата за безбедна и успешна кампања“, изјави извршниот директор на Комитетот за конвенцијата на Демократската партија“,
Џо Солмоназе.
Фаворитот за освојување на претседателската номинација кај демократите, поранешниот американски потпретседател, Џозеф Бајден, претходно кажа дека би било тешко да се замисли дека конвенцијата ќе се одржи кон средината на јули како што првично било планирано.
Изборната трка за претседателски кандидат кај демократите сè уште не е завршена, а главниот ривал на Бајден е сенаторот од Вермонт, Берни Сандерс.
Поради коронавирусот одложени се внатрепартиските избори во повеќе од 10 сојузни држави. По гласањата во повеќе сојузни држави, Бајден има најголем број делегати зад себе, кои на партиската конвенција и формално ќе го избираат претседателскиот кандидат.
Претседателски кандидат на Републиканската партија повторно ќе биде претседателот Доналд Трамп.
Партиската конвенција на републиканците, на која ќе треба само формално да се потврди номинацијата на Трамп, ќе се одржи од 24 до 27 август во Шарлот, во сојузната држава Северна Каролина.