Засилувачка доза ќе може да примат лицата над 65 години, но и помладите кои се под ризик поради тешка болест или изложеност на вирусот поради професијата, како што се здравствени работници, наставници, луѓето во засолништата за бездомници…
Американската Агенција за храна и лекови (ФДА) ја одобри употребата на третата доза од вакцината на „Фајзер/Бионтек“ против ковид-19 за најзагрозените категории граѓани.
ФДА одлуката ја соопшти вчера откако минатата недела независната советодавна комисија даде таква препорака. Одобрувањето на трета или т.н. засилувачка доза се однесува на лицата постари од 65 години, но и помладите кои се сметаат за најмногу изложени на ризик поради тешка болест или професијата.
Одлуката го отвора патот уште во текот на оваа недела третата доза да биде достапна за милиони Американци кои втората дозата ја примиле пред најмалку шест месеци.
В.д. директорката на ФДА, Џенет Вудкок, појасни дека одлуката значи оти засилувачката доза ќе биде дозволена за групи како здравствените работници, наставниците, работниците во самопослугите и луѓето во засолништата за бездомници и затворите.
Во очекување на одлуката на ФДА, претседателот Џо Бајден и осум високи здравствени службеници, претходно најавуваа можност за трета доза за целото население над 16 години. Меѓутоа, советодавниот тим на Агенцијата оцени дека достапните податоци не ја оправдуваат вакцинацијата со третата доза на општата популација постара од 16 години. Од ФДА ја оставија отворена можноста во иднина да го преиспитаат прашањето за користење засилувачка доза за пошироката популација.