Иако „УСС Џорџија“, подморница на нуклеарен погон, веќе беше во Средоземното Море во јули, според објавата на американската војска на социјалните мрежи, распоредувањето на подморницата ретко се објавува јавно
Американскиот секретар за одбрана Лојд Остин нареди распоредување на подморница со наведувана ракета на Блискиот Исток, соопшти Пентагон, по атентатот на високи членови на Хамас и Хезболах, поради што регионот се подготвува за можни напади од Иран и неговите сојузници.
Иако „УСС Џорџија“, подморница на нуклеарен погон, веќе беше во Средоземното Море во јули, според објавата на американската војска на социјалните мрежи, распоредувањето на подморницата ретко се објавува јавно.
Во соопштението по разговорот на Остин со неговиот израелски колега, Пентагон информира дека американскиот секретар за одбрана ѝ наредил на ударната група бродови на носачот „Абрахам Линколн“ да го забрза своето распоредување во регионот.
„Министерот Остин ја повтори посветеноста на Соединетите Држави да ги преземат сите можни чекори за одбрана на Израел и го истакна зајакнувањето на американското воено присуство и капацитети на целиот Блиски Исток во светло на ескалацијата на регионалните тензии“,
се додава во соопштението на Пентагон.
Американската војска веќе најави дека ќе распореди дополнителни борбени авиони и воени бродови на морнарицата на Блискиот исток додека Вашингтон се обидува да ја зајакне одбраната на Израел.
Исмаил Ханије, политичкиот лидер на Хамас поддржан од Иран, беше убиен во иранскиот главен град Техеран на 31 јули, во напад што поттикна закани за иранска одмазда против Израел, кој се бори против палестинската исламистичка група во Газа. Иран го обвини Израел за убиството, но Израел не ја презеде одговорноста.
Убиството и ликвидацијата на висок воен командант на либанската група Хезболах, поддржана од Иран, Фуад Шукра, од страна на Израел во напад на Бејрут, ја зголеми загриженоста дека конфликтот во Газа може да ескалира во поширока војна на Блискиот Исток.
Иран соопшти дека САД сносат одговорност за убиството на Ханије поради нивната поддршка за Израел.
Ројтерс објави дека неколку американски и коалициски војници биле ранети во напад со беспилотно летало во Сирија во петокот, што е втор голем напад во последните денови врз американските сили во услови на зголемени тензии на Блискиот Исток.