Малку е веројатно дека муницијата ќе направи голема разлика на бојното поле во Украина во време кога оружјето со долг дострел и системите за противвоздушна одбрана се на врвот на листата на желби на Украина
Соединетите Американски Држави ѝ испратија на Украина повеќе од милион парчиња иранска муниција кои беа запленети минатата година во водите на Индискиот Океан, соопшти вчера американската војска. Со години, американската морнарица запленувала оружје за кое се верува дека доаѓа од Иран за борците во Јемен поддржани од Иран, а кое обично се транспортирало со рибарски чамци.
Централната команда на САД, која е одговорна за воените операции на Блискиот Исток, објави дека во Украина биле испратени околу 1,1 милион куршуми со калибар 7,62 мм. Муницијата – која потекнува од иранската револуционерна гарда и е наменета за силите на Хутите во Јемен – била запленета од американската морнарица во декември 2022 година.
„САД се посветени да работат со нашите сојузници и партнери за да го запрат протокот на иранска смртоносна помош во регионот со сите законски средства, вклучително и санкции и забрани од САД и ОН“,
се вели во соопштението на Централната команда.
Малку е веројатно дека муницијата ќе направи голема разлика на бојното поле во Украина во време кога оружјето со долг дострел и системите за противвоздушна одбрана се на врвот на листата на желби на Украина. Запленетата муниција, исто така, веројатно нема да ја намали загриженоста за можното запирање на снабдувањето со западно оружје за Киев.
Конгресот на САД не вклучи нови пари за Украина во привремениот нацрт-закон за трошење што го усвои во саботата за да ја одржи федералната влада отворена, нагласувајќи ја зголемената неподготвеност на некои републиканци да му обезбедат средства на Киев.
Минатата година, британската кралска морнарица објави дека еден од нејзините воени бродови запленил иранско оружје, вклучувајќи ракети земја-воздух и мотори за крстосувачки ракети, во меѓународните води јужно од Иран.
Јеменското движење Хути се бори против коалицијата предводена од Саудиска Арабија од 2015 година во конфликт во кој загинаа стотици илјади луѓе. Соединетите Држави извршија притисок врз својот сојузник Саудиска Арабија да ја прекине војната.