За САД, необјаснива и за целосна осуда е ваквата одлуката на талибанците. За ваквата одлука реагираше и генералниот секретар на Обединетите нации (ОН), Антонио Гутереш, кој, како што се вели од неговиот кабинет, одлуката ја примил со длабока загриженост
Соединетите Американски Држави и Обединетите нации (ОН) остро реагираа на одлуката на талибанските власти со која на жените во Авганистан им се забранува да студираат во универзитетите во земјата.
За САД, необјаснива и за целосна осуда е ваквата одлуката на талибанците.
„САД се во контакт со сојузниците во врска со одлуката од вторникот на талибанското Министерство за образование. САД ја осудуваат необјаснивата одлука на талибанците да ги спречат авганистанските жени да добијат универзитетско образование“,
соопшти портпаролката на Советот за национална безбедност на Белата куќа, Адриен Вотсон.
За одлуката на талибанците реагираше и генералниот секретар на Обединетите нации (ОН), Антонио Гутереш кој, како што се вели од неговиот кабинет, одлуката ја примил со длабока загриженост.
Гутереш апелираше до талибанските власти да обезбедат еднаков пристап до образование на сите нивоа и повтори дека со ускратување на образованието не само што се кршат правата на жените и девојчињата, туку ќе доведе до разорно влијание врз иднината на земјата.
Талибанските власти вчера донесоа одлука, според која, на жените во Авганистан им е забрането да одат и да се школуваат на приватни и на јавни универзитети во земјата.
Оваа одлука дојде за помалку од три месеци откако неколку илјади девојки и жени полагаа приемен испит на универзитетите низ земјата.
Откако Талибанците ја презедоа власта во август 2021 година, универзитетите во Авганистан имаат посебни училници и влезови за мажи и жени, а на студентките можеа да им предаваат само професорки или повозрасни професори.
Оваа рестриктивна мерка на талибанците во областа на образованието на жените е најнова во серијата ограничувања воспоставени против жените и најверојатно ќе предизвика загриженост кај меѓународната заедница.