Најновото ограничување на образованието на жените од страна на талибанските валсти кои управуваат со Авганистан најверојатно, како што пишуваат странските медиуми, ќе предизвика загриженост кај меѓународната заедница, која официјално не ја признава талибанската администрација
Од денеска на жените во Авганистан им е забрането да одат и да се школуваат на приватни и на јавни универзитети во земјата, изјави портпаролот на талибанската владата, јавуваат агенциите.
Со писмо, чија автентичност ја потврдил портпаролот на Министерството за високо образование, на авганистанските државни и приватни универзитети им е наредено веднаш да го прекинат пристапот на студентките, во согласност со одлуката на владата.
Одлуката како што се наведува е објавена по состанокот на талибанската влада.
Најновото ограничување на образованието на жените од страна на талибанските валсти кои управуваат со Авганистан најверојатно, како што пишуваат странските медиуми, ќе предизвика загриженост кај меѓународната заедница, која официјално не ја признава талибанската администрација.
Странските влади, вклучително и Соединетите Држави, рекоа дека е потребна промена во образовната политика на жените пред да можат да размислат за формално признавање на администрацијата предводена од Талибанците.
Последната одлука претставува дополнителен удар врз правата на девојките и жените под талибанска власт во Авганистан.
Пред три месеци илјадници девојчиња и жени полагаа приемен испит низ Авганистан. Но, беа наметнати широки ограничувања за предметите што можеа да ги студираат – ветеринарна наука, технички предмети, економија и земјоделство беа забранети, а новинарството беше строго ограничено.
Откако Талибанците ја презедоа власта во август 2021 година, универзитетите имаат посебни училници и влезови за мажи и жени.
На студентките можеа да им предаваат само професорки или повозрасни професори.
Во ноември, годинава властите им забранија на жените да влегуваат во парковите во главниот град Кабул, тврдејќи дека таму не се почитува исламскиот закон.
Како што објави Радио Слободна Европа во октомври, Талибанците им наредиле на професорите мажи и средношколците во јужната провинција Кандахар да потпишат писмено ветување дека ќе се придржуваат до екстремистичкото толкување на исламскиот шеријат на милитантната група.
Ова вклучува почитување на строгиот кодекс на облекување на Талибанците за мажи – пуштање брада, носење турбан или исламска капа и носење пирхан тумбан, традиционална широка кошула и панталони вообичаени во руралните делови на Авганистан.