„Имаме робустна билатерална агенда и ги продолжуваме нашите дискусии со владата во однос на натамошната евроатлантска интеграција, продолжување на напредокот во имплементирањето на Преспанскиот договор, продлабочување на добрососедските односи на земјата особено со нејзините регионални НАТО-сојузници, како и разговори за потребата за одржлив и интензивиран фокус на владеењето на правото, особено на справувањето со корупцијата“, објаснуваат од амбасадата на САД зошто Брнз токму во овој период на „ковање“ на новата влада се сретнала со министерскиот двоец
Во екот на јавните пораки меѓу власта и опозицијата за тоа кој има легитимитет да ја формира новата влада и кој се ќе партиципира во неа, како изненадување дојде официјалната информација за средба на клучните дипломатски претставници во земјава – американската амбасадорка Брнз и евроамбасадорот Жбогар, со министрите Шекеринска и Димитров.
Пораката која амбасадорскиот двоец ја упатил до двајцата министри, според официјалното соопштение од МНР, е дека „императивот на наредната влада треба да биде континуитетот на тој пат (н.з. евроинтеграцискиот), како и посветеноста на владеењето на правото, економскиот развој и понатамошните реформи“.
Прашањето е зошто токму во период кога се „кова“ новото парламентарно мнозинство и новата влада, Брнз и Жбогар се среќаваат со Шекеринска и со Димитров и со нив зборуваат за приоритетите на новата влада. Зошто на средбата не присуствувал вицепремиерот за европски прашања, Бујар Османи, кој е од редовите на ДУИ?
Прашавме во американската амбасада: Зошто амбасадорката Брнз решила да се сретне токму со овие соговорници во време кога траат преговорите за ново мнозинство и нова влада?
Одговорот од амбасадата е дека амбасадорката Брнз била на состанокот за да се потенцира важноста на некои прашања во идниот период.
„Имаме робустна билатерална агенда и ги продолжуваме нашите дискусии со владата во однос на натамошната евроатлантска интеграција, продолжување на напредокот во имплементирањето на Преспанскиот договор, продлабочување на добрососедските односи на земјата особено со нејзините регионални НАТО-сојузници, како и разговори за потребата за одржлив и интензивиран фокус на владеењето на правото, особено на справувањето со корупцијата. Напредокот по овие стратешки прашања, клучни и за нашите билатерални односи и за иднината на Северна Македонија, ја надминува политиката“,
беше одговорот од амбасадата на САД.
Жбогар денеска се сретна со ДУИ, деновиве планира средба со ВМРО-ДПМНЕ
Отсуството на Бујар Османи, кој го води токму ЕУ-ресорот, на вчерашната средба беше донекаде „компензирано“ со денешниот состанок со амбасадорот Жбогар во неговиот кабинет.
Според соопштението од кабинетот на Османи, и на денешниот состанок се зборувало за потребата од „функционална влада со европска перспектива“.
„На земјата и е потребна стабилна и функционална Влада, со европска перспектива, која ќе може адекватно да се подготви и да ги започне претстојните преговорите со Европската Унија, како и да биде гарант за регионалната стабилност при решавање на важните регионални прашања“,
му рекол Османи на Жбогар.
Дали тоа значи дека ДУИ себе си веќе се гледа како дел од идната влада? Ако е така, тогаш зошто и Османи не беше на вчерашната средба во Министерството за надворешни работи заедно со Димитров и Шекеринска?
„360 степени“ истото прашање го постави и до Делегацијата на ЕУ: зошто амбасадорот Жбогар реши вчера да се сретне токму со овие соговорници во време кога траат преговорите за ново мнозинство и нова влада?
„По одржувањето на изборите амбасадорот Жбогар, на нивно барање, се сретна со претставници на СДСМ, ДУИ и Алијанса за Албанците за да разговараат за прашања поврзани со изборниот процес. Амбасадорот планира средби со претставници на ВМРО-ДПМНЕ за да разговара за истите прашања. На сите средби амбасадорот потенцираше дека ЕУ очекува политичките актери и институции да обрнат внимание на очекувањата на граѓаните и да продолжат да испорачуваат во делот на ЕУ-обврските, да го одржат и забрзаат имплементирањето на ЕУ-реформите, особено во сферата на владеењето на правото, борбата против организираниот криминал и корупција, како и натамошно зајакнување на добрососедските односи”,
беше одговорот што го добивме од Делегацијата на ЕУ.