На прашање испратено од Македонската информативна агенција (МИА), дали САД сметаат оти бугарската реакција околку нападот на Христијан Пендиков, како и декларацијата изгласана во Собранието на Бугарија, е преувеличување до невидени размери од страна на официјална Софија, Вашингтон одговори дека двете страни веќе работат на деескалација на ретороиката и го поздрави мирното чествување на денот на раѓањето на Делчев
Американскиот Стејт департмент го поздрави мирното и достоинствено честување на денот на раѓањето на македонскиот револуционер Гоце Делчев кое се одржа во саботата во Скопје, како и напорите на македонските и бугарските лидери за деескалација на меѓусебната реторика.
На прашање испратено од Македонската информативна агенција (МИА), дали САД сметаат оти бугарската реакција околку нападот на Христијан Пендиков, како и декларацијата изгласана во Собранието на Бугарија, е преувеличување до невидени размери од страна на официјална Софија, Вашингтон одговори дека двете страни веќе работат на деескалација на ретороиката и го поздрави мирното чествување на денот на раѓањето на Делчев.
„Иднината на Северна Македонија е во ЕУ. САД продолжуваат да ја поддржуваат целосната евроатлантска интеграција на Северна Македонија“,
изјави официјален Вашингтон за МИА.
Одбележувањето на 151-годишнината од раѓањето на великанот Гоце Делчев во саботата, на 4 февруари во Скопје, помина под силно полициско обезбедување, но во мирна атмосфера и покрај најавите дека настанот ќе биде од висок безбедносен ризик поради зголемените тензии со Бугарија во последниов период.
Тензична атмосфера, сепак, завладеа на граничниот премин „Деве Баир“, кога бугарски државјани кои сакале да присуствуваат на одбележувањето на роденденот на Гоце Делчев во Скопје не беа пуштени да влезат на македонска територија поради пад на граничниот систем за контрола.
Подоцна, Министерство за внатрешни работи соопшти дека тројца бугарски државјани биле приведени поради нарушување на јавниот ред и мир и недолично однесување со полициските службеници на граничниот премин „Деве Баир“. На тројцата им беше изречена и парична казна во износ од 300 евра и мерка протерување од земјава и забрана за влез во државата за период од три години.