Министерството за здравсто денеска објави дека досега во земјава се аплицирани 847 336 дози на вакцини. На почетокот на месецов таа бројка изнесуваше 557 400
Динамиката на вакцинирање во последните денови, прилагодена на бројот на жители, ја прави земјава лидер по бројот на аплицирани вакцини во регионот и пошироко
Почна бавно, бавно дури и за балкански стандарди. Но, изминатиов месец С Македонија „фати чекор“ со вакцинацијата, покажуваат податоците за земјава и регионот. И не само тоа, туку во земјава во моментов се аплицираат повеќе вакцини по глава на жител отколку во соседството.
Како што покажуваат податоците од базата „нашиот свет низ податоци“, Северна Македонија само на 23 јули вакцинирала околу 0,87% населението. Истиот ден Грција вакцинирала 0,65% од населението, Бугарија 0,15%, а Србија 0,14%. За тој ден нема податоци од Албанија и од Косово, но оваа бројка во тие две земји е пониска во деновите за кои има податоци.
Брзината на вакцинацијата во земјава во моментов е повисока и од светскиот и од просекот на сите континенти. Ако на 23 јули во Северна Македонија се аплицирани вакцини на 0,87% од населението, во Европа тој просек е 0,63%, во Азија 0,57%, во Јужна Америка 0,56%, во Северна Америка 0,49%, во Африка 0,02%.
И покрај напредокот во последниов месец, Северна Македонија се уште е под светскиот просек според процентот на население кое примило барем една доза вакцина против ковид-19. До 23 јули, барем една доза вакцина, имале примено 23,42% од граѓаните на земјава. Светскиот просектој ден бил околу 27,11%. Во регионот, подобри од земјава и од светскиот просек, се Србија со 41,28% од населението со примена барем една доза на вакцина и Грција, каде барем една доза примиле 53,52% од граѓаните. Албанија, Бугарија и Косово имаат понизок процент на вакцинација од земјава, барем кога е во прашање оваа статистика.