Шефицата на Основното јавно обвинителство за гонење организиран криминал и корупција, Вилма Русковска, го дели мислењето со колегите од Здружението на јавни обвинители дека не треба да бидат ставени на минимална плата за месеците април и мај.
„И обвинителите и судиите треба да се солидализираат во оваа криза, но не се согласувам со минимална плата. Сметам дека ќе беше многу подобро и ќе имаше поголем ефект доколку на сите се скратеше одреден процент од платата, 20, 30 или 40 отсто. Тука мислам на сите, не само на судиите и обвинителите туку и на администрацијата“,
изјави денеска Русковска за ТВ Телма.
Таа рече дека во Обвинителството за гонење организиран криминал и корупција претходно биле договори дека ако добијат цела плата, секој обвинител да одвои по 10 000 денари за солидарниот фонд.
Вчера од Здружението на обвинители обвинители објавија писмо испратено до министерката за правда Рената Дескоска во која го изнесуваат ставот дека Уредбата со која се кратат платите на јавните обвинители е правно спорна, како и дека намалувањето на платите е неопходно за сите да го понесат товарот, меѓутоа тие не треба да бидат доведени на висина на минималецот од 14 500.
Од Министерството за правда, пак, рекоа дека ја запознале Владата со писмото и посочија дека сите вакви дописи прво се разгледуваат од страна на кризниот штаб. Засега, посочија, нема никаква одлука по ова барање.
Писмо до Владата и до премиерот Оливер Спасовски испратија и од Здружението на судии барајќи да се смени Уредбата и да им се овозможи тие сами, преку своите органи – Судскиот совет и Судскиот буџетски совет, на доброволна основа да отстапат дел од своите плати.
И тие сметаат дека Уредбата е спорна бидејќи е спротивна на Уставот каде се гарантира независноста на судската власт, како и на Законот за плати на судиите (член 2, став 2) во кој пишува дека платите на судиите не може да се намалат со закон или со одлука на државен орган.
Уредбата беше донесена на седница на Владата на 7 април, а објавена во „Службен весник“ на 9 април. Покрај судиите и обвинителите, на минималец се ставени и другите избрани, именувани и назначени лица во јавниот сектор – пратеници, шефот на државата, министри, градоначалници.