На листата Американци кои не смеат да влезат во Русија се двајцата браќа и сестрата на американскиот претседател Џо Бајден. На списокот се и портпаролката на Белата куќа, Карин Жан-Пјер, сенаторот од Вермонт, Берни Сандерс, кој силно ја критикуваше руската офанзива во Украина, како и разни политички личности и членови на американската администрација
На група од 200 американски државјани, вклучелно и сестрата и двајцата браќа на американскиот претседател Џо Бајден им се забранува влез во Русија, соопшти денеска Министерството за надворешни работи на Руската Федерација, јави Ројтерс.
Како што е наведено, забраната за влез на американски државјани на руска територија е одговор на санкциите кои претходно Вашингтон ги воведе кон Русија.
„Одлуката е донесена како одговор на санкциите на администрацијата на Бајден, не само против руските функционери, туку и против сите оние кои поради една или друга причина не го сакаат Вашингтон“,
соопшти руското Министерство за надворешни работи.
На листата Американци кои не смеат да влезат во Русија се двајцата браќа на претседателот Џо Бајден – Џејмс Брајан Бајден и Френсис Вилијам Бајден и сестрата Валери Бајден Овенс.
На списокот се и портпаролката на Белата куќа, Карин Жан-Пјер, сенаторот од Вермонт, Берни Сандерс, кој силно ја критикуваше руската офанзива во Украина, како и разни политички личности и членови на американската администрација.
На крајот на јуни годинава Русија им забрани влез на сопругата и ќерката на Бајден, бидејќи американските власти воведоа забрана за влез на членовите на семејството на рускиот претседател Владимир Путин. Таа забрана се однесува на две ќерки на Путин и на самиот претседател на Русија.
На Бајден, исто така, веќе му е забранет влез на руска територија.