Русија има повеќе од 680 000 мртви од почетокот на пандемијата, што е еден од најлошите смртни биланси од коронавирус во светот
Русија, Чешка и Словачка денеска евидентираа рекорден број случаи на коронавирус, соопштија здравствените власти во овие земји, погодени од варијантата омикрон.
Во Русија бројот на дневни случаи се искачи на 141 883, а еден ден претходно беше 125 836. Работната група на владата регистрирала 678 смртни случаи во последните 24 часа. Сепак, руските власти денеска соопштија дека немаат намера да воведат нови мерки и покрај огромниот пораст на случаите.
„Здравствениот систем опстојува, смртноста не е поголема од периодот низ кој поминавме последните две години, затоа сега не гледаме причина за воведување посебни ограничувања“,
изјавила за руските медиуми Ана Попова, шефица на руската здравствена агенција Роспотребнадзор.
Русија има повеќе од 680 000 мртви од почетокот на пандемијата, што е еден од најлошите смртни биланси од коронавирус во светот.
Чешка вчера забележа 57 195 нови случаи, што е рекорден број од почетокот на пандемијата. Чешкото Министерство за здравство регистрирало и 9 775 случаи на реинфекција. Бројот на хоспитализирани е 2 653, што е многу помалку од претходните ситуации во текот на пандемијата.
Во Словачка за еден ден се пријавени повеќе од 20 000 нови случаи на ковид-19, по првпат од почетокот на пандемијата. Словачка, земја со 5,5 милиони жители, евидентираше 20 224 новозаразени, од кои околу 61 отсто се невакцинирани, соопшти Министерството за здравство.