Станува збор за клучен документ кој ќе биде основа за донесување на одлуката за визна либерализација за Косово на ниво на држави членки на Европската Унија (ЕУ)
Според процедурите во европските институции, откако Европската комисија ќе препорача визна либерализација за една земја, процесот продолжува да се води на два колосека: на ниво на Европскиот парламент и во Советот на министри на ЕУ, кој ја носи конечната одлука
Европската комисија (ЕК) ја потврдила препораката за укинување на визниот режим за граѓаните на Косово, оценувајќи дека препораката која датира од 2018 година останува „во потполност важечка“.
Станува збор за клучен документ кој ќе биде основа за донесување на одлуката за визна либерализација за Косово на ниво на држави членки на Европската Унија (ЕУ).
Според документите во кои Радио Слободна Европа имала увид, Косово воспоставило силна правна и оперативна рамка за борба против корупцијата, организираниот криминал и справување со миграциските и безбедносните ризици.
„Косово продолжи да го консолидира напредокот во клучните области идентификувани во мапата на патот за либерализација. Со оглед на тоа, основата на препораката на Комисијата од 2018 година државјаните на Косово да се изземат од барањето виза за кратки претстои останува во потполност важечка“,
било наведено во документот на Европската комисија.
Законодавните процедури кои би воделе до одлука за укинување на визниот режим почнуваат формално на 13 октомври, кога состанок треба да одржи работната група за визи која ќе ја почне првата расправа по ова прашање.
Косово во 2012 година ја доби Мапата за патот за визна либерализација. Потоа во 2018 година Европската комисија потврди дека земјата ги исполнила сите критериуми за укинување на визниот режим.
Европскиот парламент, една од двете институции кои одлучуваат за тоа, во неколку наврати гласаше за визна либерализација за Косово, но прашањето со години наидуваше на застој на политичко ниво, односно во Советот на министри на ЕУ кој ја носи конечната одлука, поради недоволна политичка волја за продолжување на процесот.
Според процедурите во европските институции, откако Европската комисија ќе препорача визна либерализација за една земја, процесот продолжува да се води на два колосека: на ниво на Европскиот парламент и во Советот на министри на ЕУ, кој ја носи конечната одлука.
Косово е единствената земја од Западен Балкан чии граѓани немаат слобода на движење во шенген-зоната.
Северна Македонија, Србија и Црна Гора имаат визна либерализација од декември 2009 година, додека Босна и Херцеговина и Албанија ја добија една година подоцна, во декември 2010 година.