„Вистина е дека има неколку препораки за составот и изборот на членовите на Судскиот совет, за разрешувањата и механизмите, но сето тоа е дел од процесот и механизмите што треба да се воведат, вклучително и новите закони што треба да се применат“, вели Рокас
Евроамбасадорот е убеден дека процесот на евроинтеграција на земјата ќе биде успешен, нагласувајќи дека има многу бенефити од пристапувањето
Амбасадорот на ЕУ во земјава Михалис Рокас смета дека реформата на судството е мајка на сите реформи. Оваа изјава на евроамбасадорот во вечерашното интервју за дневникот на МТВ доаѓа како одговор на прашање за реформите во судството кои се најавуваат од Владата, за разрешувањето на членови на Судскиот совет, како и за постапката за смена на државниот обвинител.
Прашан што според него е клучно за судството да почне да функционира по европски терк, Рокас рече:
„Тоа мора да биде приоритет и цврсто верувам дека ова е основата. Откако реформите ќе бидат спроведени, корупцијата може да биде елиминирана, а довербата на инвеститорите ќе се врати и тоа е многу важно за државата да просперира. Од страна на ЕУ дадовме многу препораки и сугестии. Тоа се препораките на механизмот за меѓусебна оценка кои ги водат правни експерти од земјите-членки на ЕУ и кои дадоа сеопфатни препораки. Вкупно 40“.
Рече дека имаат извештаи и за владеење на правото претставени минатата година, како и годишниот извештај за земјата што излегува секоја есен.
„Сето тоа ги содржи потребните чекори за усогласување на земјата со стандардите на ЕУ во однос на владеењето на правото. Значи сето ова е дел од процесот. Вистина е дека има неколку препораки за составот и изборот на членовите на Судскиот совет, за разрешувањата и механизмите, но сето тоа е дел од процесот и механизмите што треба да се воведат, вклучително и новите закони што треба да се применат. Нашите препораки не се насочени против одредени поединци во судскиот систем, туку претставуваат низа значајни препораки кои доколку се имплементираат и доколку законите бидат усвоени ќе овозможат зајакнување на судството и негово независно функционирање“,
одговори Рокас.
Рокас говореше и за прашања околу уставните измени велејќи дека од ЕУ се свесни оти актуелната влада сака ова прашање да го реши со одредени гаранции и уверување дека нема да има билатерализација на процесот, но според него, тие се факт и обврска преземена пред две и пол години, едногласно од ЕУ, односно од земјите – членки и од Северна Македонија.
Рокас рече дека ЕУ верува оти треба да и се даде простор на дипломатската активност која е во тек за да даде резултати, а во исто време и да не се изгуби фокусот.
Евроамбасадорот вели дека процесот на евроинтеграции се темели на заслуги, а оти копенхашките критериуми и правната рамка на ЕУ ги вклучуваат правата на малцинствата, особено акцискиот план за малцинствата, кој мора да биде присутен.
„Тоа постои и важи. Како што кажав претходно, свесни сме дека ова е прашање што актуелната влада сака да го реши со одредени гаранции и уверување дека нема да има билатерализација на процесот. Ние го разбираме тоа, но исто така, и лидерите на ЕУ веќе се изјаснија против билатерализација во процесот на проширување. Сепак, сите знаеме кои се преземените обврски и веќе ја споменав дипломатската активност која е во тек. Затоа верувам дека треба да и дадеме простор на дипломатијата да даде резултати, а во исто време, не смееме да го изгубиме фокусот, затоа што моментумот е тука, можноста е тука и средствата се достапни. Треба да се осигураме дека го притискаме педалот за гас постојано кога станува збор за реформите што треба да се спроведат бидејќи овие реформи преку реформската агенда или преку планот за раст се неопходни. И токму тоа го очекуваат граѓаните на земјата“,
рече Рокас.
Рокас во интервјуто вели дека целосно ја разбира фрустрацијата и дека населението во Северна Македонија е уморно од чекање 20 години. Тој вели дека ќе се држи до целта која ја кажал кога пристигнал во земјава нагласувајќи дека ситуацијата овојпат е значително поинаква.
„Прво, имаме нов моментум за проширување. Геостратешките императиви го направија проширувањето неопходност, нешто што мора да се случи. Ова не беше секогаш случај. А го имаме и планот за раст на ЕУ и поврзаната реформска агенда. Ова е начинот на кој постепената интеграција на Северна Македонија во ЕУ ќе се случи, особено во внатрешниот пазар. Но, исто така имаме тоа што нашата претседателка Урсула фон дер Лајен го кажа кога дојде во Скопје пред три месеци, кога испрати порака за надеж. Од една страна, таа нагласи дека се уште постои една пречка што треба да се надмине, уставните измени на кои земјата се обврза. Но, таа е уверена дека преку заедничка работа, дијалог и соработка ќе ја надминеме оваа пречка“,
додаде Рокас.
Евроамбасадорот е убеден дека процесот на евроинтеграција на земјата ќе биде успешен, нагласувајќи дека има многу бенефити од пристапувањето.
„Сигурен сум дека ако работиме заедно рака под рака со Владата и сите политички партии во Северна Македонија ќе ја постигнеме целта. Свесни сме за ситуацијата. Добро ја знаеме позицијата. И исто така сме свесни дека во моментов има многи интензивна дипломатска активност. Додека се одвива оваа дипломатска активност, треба да и се даде време да даде резултати додека истовремено ја спроведуваме рефорската активност што веќе е усвоена“,
рече Рокас.
Евроамбасадорот и оддаде, како што посочи, признание на земјава за целосното усогласување со заедничката надворешна и безбедносна политика. Ова е огромно постигнување и Европската унија е многу благодарна за тоа, рече тој.