Доаѓањето на Пенов на министерската функција ќе биде негово враќање на политичката сцена по повеќе од 10 години
Предлогот за избор на Ристо Пенов за министер за локална самоуправа денеска ќе биде на дневен ред на 88. седница на Собранието на Република Северна Македонија.
За ова министерско место Ристо Пенов е предложен од Либерално-демократската партија откако досегашниот министер Горан Милевски на 20 септември, од лични причини, си поднесе оставка од функцијата.
Пратеничката Моника Зајкова од Либерално-демократската партија вели дека преземањето на поранешниот лидер на партијата Пенов на Министерството за локална самоуправа ќе ѝ даде нова димензија на партијата.
Таа вели дека Пенов имал успешни проекти додека го водел Градот Скопје и дека може да го преземе кормилото на Министерството за локална самоуправа, а тоа, како што вели, ѝ дава една нова димензија на партијата во делот на тоа што ние го викаме обединување, да малку ги сплотиме луѓето на едно место и да настапиме со поинаков концепт.
Доаѓањето на Пенов на министерската функција ќе биде негово враќање на политичката сцена по повеќе од 10 години. Тој е роден на 28 септември 1957 година во Велес, а првата висока функција што ја извршуваше беше градоначалник на Скопје. На функцијата тој се задржа во два мандата (1996-2000 и 2000-2004), а потоа беше и пратеник, исто така во два мандата. Од партиски функции, пак, беше секретар на Демократската партија до нејзиното спојување со Либералната партија во 1997 г., а потоа беше и потпретседател и претседател на Либерално-демократската партија во периодот од 1999 до 2007 година.