Врз основа на низата забелешки за работата на оваа институција за 2019 година, мислењето на ревизорите за вистинитоста и објективноста на финансиските извештаи, како и за усогласеност со законите и прописите е неповолно
Управата за заштита на културното наследство нема изготвено годишен извештај за работењето кој треба да го достави до Владата ниту, пак, национална стратегија за заштита на културното наследство која се донесува за период од 5 години и треба да содржи долгорочни основи на политиката за заштита и користење на културното наследство.
Ова се само дел од забелешките што во извештајот ги наведува Државниот завод за ревизија врз основа на ревизијата на финансиските извештаи заедно со ревизијата на усогласеност за 2019 година. Врз основа на ова мислењето за вистинитоста и објективноста на финансиските извештаи, како и за усогласеност со законите и прописите е неповолно.
Антички театар Скупи
Во редот на забелешки што го креираат ова неповолно мислење е за проектот за истражувања, заштита, конзервација, реставрација, реконструкција и презентација на Античкиот театар Скупи кој е планиран уште во 2016 година, а за кој Владата дала согласност за спроведување на постапка за повеќегодишна јавна набавка, од 2016 до 2019 година во висина од 523 милиони денари во обем и динамика утврдени согласно мислењето на Министерството за финансии.
Но она што го утврдиле ревизорите е дека од 2016 година до крајот на 2019 година реализирани се само 7,56 проценти од договорот.
„Со увид во буџетот на Управата за 2016, 2017, 2018 и 2019 година, ревизијата утврди дека не се планирани средства во износ утврден во мислењето на МФ, по кое се дава согласност за реализација на оваа повеќегодишна постапка за јавна набавка; Без добиено одобрение за градење изведувачот е воведен во работа што не е во согласност со член 56 од Закон за градење; Од страна на изведувачот во септември 2019 година е испратен допис до Управата со кој се известува за малиот процент на реализација на договорот и се истакнува дека извршени се сите подготвителни работи, но до датумот кога е доставен дописот нема инструкции кога и на кој начин ќе се продолжи со проектот. Необезбедувањето на средства во буџетот на Управата за повеќегодишната градба на Античкиот театар Скупи придонело реализацијата на договорот до крајот на 2019 година да е само 7,56 проценти“,
се вели во извештајот.
Плаошник
Ревизорите утврдиле дека од програмата за Возобновување на Светиклиментовиот универзитет на Плаошник, од 2010 година до денот на ревизијата, потрошени се средства во износ од 748 милиони денари, врз основа на два основни договора по спроведени постапки за јавни набавки за кои во текот на годините се склучени повеќе анекси. Но, ДЗР, утврдил повеќе слабости во делот на непочитување на одредбите од Законот за јавни набавки, Законот за градење и одредбите на склучените договори. Како резултат на ваквата состојба, пролонгирани се роковите за изградба на објектите, како и поскапување на градбите за што се потрошени повеќе буџетски средства во услови кога објектите сѐ уште не се во функција.
Светиклиментовиот универзитет на Плаошник се појавува и во делот од ревизорскиот извештај кој се однесува на прашања за неизвесност и континуитет, кои можат да предизвикаат идни финансиски импликации.
„Во тек се судски постапки кои се водат против Управата, за кои постои неизвесност од конечниот исход и има можност од дополнително оптоварување на буџетот на Управата со камати и судски трошоци“,
посочуваат ревизорите.
Како уште една забелешка во ревизорскиот извештај е и неусогласеност на сметководствената со фактичката состојба – Управата нема извршено попис на средствата и изворите на средствата согласно законските и подзаконските акти.
Во деловните книги на Управата не се евидентирани градежните објекти во износ од 752 милиони денари во периодот додека тие се наоѓаат во изградба, односно за извршената реконструкција и адаптација не е извршено зголемување на вредноста на градежните објекти, се вели во извештајот.