Навидум e обична куќа далеку од градскиот метеж. Но, овој објект близу скопското село Батинци, е и центар за рехабилитација на зависници од дрога. Зад овие ѕидови функционира работилница за репарирање мебел, во која, преку работа, се одвива и процес на рехабилитација. Оттаму и името на центарот – „Рето надеж“.
„Пред се, сме во работна терапија, се привикнуваат да работат луѓе, да можат да влезат во некој занает, или да влезат во општо корисна работа, да можат да размислуваат трезвено, да можат да имаат некоја визија за напред, во ред, во дисциплина, во ствари со кои можат да се ресоцијализираат во општеството.“- вели Никола Чулевски од „Рето надеж“.
Вакви центри основани од американски мисионер има во повеќе од 20 земји во светот. Во земјава постои 13 години. Во моментов овде работат, но и живеат 22-ца.
„Некои момци се грижат за храната, да приготват, некои момци се грижат да исперат алишта, некои да ја исчистат куќата, други поправаат бела техника, имаме мини отпад за секундарни суровини и репарирањето, а други одат со комби да го земат намештајот. Плата не земаме, овие средства се ставаат на едно место и со нив се покриваат потребите каде ќе се јават, без разлика какви се.“- истакнува Чулевски.
Во работилницата се е „под конец“. И алатите и работната дисциплина.
Завршниот производ е изложен во продавница наспроти работилницата.
„Како времето поминува овде, нешто повеќе, на некој начин да кажам, сум научил, сум прифатил работи. Едноставно да бидеш личност одговорна, да бидеш личност која ќе може да води живот и да помогне на друг.“- го споделува своето искуство Јоце Богатинов.
Многумина успеале да се откажат од зависноста и да се вратат во нормалниот живот. Пораката од „Рето надеж“ е иста за сите.
„Стварно има излез. Има решение за проблемот. Тоа мислам дека е најбитна работа. Многу луѓе денес, почнувајќи од мои пријатели, кажуваат дека нема излез, нема решение за дрогата, па кажуваат дека мора одредени терапии да примаш до крајот на животот. Според мене, не обвинувајќи никого, тоа е лага, во која јас не верувам.“- порачува Јоце Богатинов.