Селекцијата на избор на нови уставни судии, како што додаде пратеникот Антонио Милошоски, власта го води со хендикеп за гласање за луѓе за кои што малку од нив знаат кој е човекот. Според него, сосема коректно би било доколку деветте кандидати за нови уставни судии биле поканети во Собранието, со цел, како што рече, да видиме кој се кандидира за уставен судија, што завршил, што работел, какви амбиции има и што знае за надлежностите на Уставниот суд и каков е неговиот личен и професионален интегритет
Ретко кој од пратениците го познава Фатмир Скендер, а сега треба да гласаме дали да биде уставен судија или не, рече денеска пратеникот од редовите на ВМРО-ДПМНЕ, Антонио Милошоски во емисиајта „Утрински брифинг“, говорејќи за судијата Фатмир Скендер од Апелацискиот суд Скопје кој го помина комисискиот филтер во Собрание за да биде нов уставен судија.
„Јас прашав некои и од пратениците за време на паузата, ретко кој од пратениците го познава овој човек, не го познавам ни јас. Ја прочитавме биографијата, но не го знаеме, и сега гласаме за или против да биде уставен судија, а не го познаваме лично, а ниту пак сме му овозможиле лично да се претстави пред пратениците, а со тоа и пред новинарите и пред граѓаните“,
изјави Милошоски во гостувањето на емисијата „Утрински брифинг“.
Селекцијата на избор на нови уставни судии, како што додаде Милошоски, власта го води со хендикеп за гласање за луѓе за кои што малку од нив знаат кој е човекот.
„Само еден пратеник стана да каже позитивно мислење за него, само пратеникот од турската партија, ниту еден друг пратеник не го познава Скендер, и токму затоа се чувствуваме хендикепирани како да гласаме за него и не ни е јасно зошто владејачкото мнозинство не се согласува да одвоиме два часа во кои што овие кандидати за уставни судии би имале можност да се претстават“,
додаде Милошоски.
Според него, сосема коректно би било доколку деветте кандидати за нови уставни судии биле поканети во Собранието, со цел, како што рече, да видиме кој се кандидира за уставен судија, што завршил, што работел, какви амбиции има и што знае за надлежностите на Уставниот суд и каков е неговиот личен и професионален интегритет.
Во своето гостување во емисијата „Утрински брифинг“, Милошоски додаде и дека е потребен закон за Уставен суд, а таквиот да биде поддржан од сите пратеници. Според него, она што треба да биде принцип во постапката за избор на уставни судии е секој кој што смета дека е истакнат правник да има право и сам да се пријави како кандидат и пријавите да не можат да се кријат.
Милошоски како пример за криење, наведе дека во мај 2020 година стигнало писмо од извесна Антоанета Димовска со 25 години судски стаж до Собранието, до Комисијата за избори и именувања и пратениците, со напомена дека треба да стигне до сите пратеници, но таков документ пратениците не добиле.
Инаку, вчера судијата Фатмир Скендер од Апелацискиот суд Скопје го помина комисискиот филтер во Собрание за нов уставен судија.
Пратениците-членови на Комисијата за прашања на изборите и именувањата со мнозинство гласови „за“ го утврдија предлогот тој да биде судија на Уставниот суд. Против гласаа пратениците од опозицијата.