Онлајн-обложувањето ќе биде една од точките што ќе ги разгледува Владата на седница, соопшти денеска министерката за финансии Нина Ангеловска.
Станува збор за иницијатива, како што објасни, на која се работело во изминатиот период, и пред корона-кризата. Иницијативата не е нешто ново, зашто и постојното законско решение содржи одредби и членови за онлајн-игри на среќа, вклучително и онлајн-обложување.
Со оваа иницијатива, на некој начин, според министерката, ќе се справиме со проблемот со физичките локации кои ги има сѐ почесто.
На ваквото решение, за онлајн-обложување, според Ангеловска, треба да се гледа од два аспекта, првиот е што во оваа индустрија работат 8 000 лица, а вториот е подобрување на регулативата.
„Ова е во постојното законско решение, но сѐ уште не беше имплементирано во пракса. И пред кризната состојба беа изработувани компаративни анализи бидејќи речиси сите земји го имаат овозможено. Ова е од една страна важно во овој период од аспект дека 8 000 лица работат во индустријата, а од друга страна е нешто што би било имплементирано во насока на подобрување на регулативата. И така треба да се гледа. Доколку е контролирана средината, ако имаме јасна и прецизна регулатива, ќе можеме да се справиме со проблемот, односно физичките локации кои сѐ почесто ги има на уплатно-исплатните места“,
нагласи Ангеловска одговарајќи на новинарски прашања.
Таа соопшти и податок дека околу 40 милиони евра се прибираат по основа на посебната давачка од оваа индустрија. Дополнително, додаде, треба да се земе предвид и персоналниот данок на доход од игрите на среќа кој учествува со околу 10 отсто од вкупно прибраниот персонален данок.
„Во вонредна состојба нови решенија ќе бидат воведувани. Треба да се обидуваме да наоѓаме начини за адаптирање на многу процеси и да носиме одлуки кои сметаме дека се соодветни за доброто на државата од секој аспект“,
рече министерката Ангеловска.