Деведесет и шест медиуми преку здружението „Медиум објектив“ бараат од Владата да биде прифатено нивното барање за ослободување од 50 отсто за плаќањето на надоместокот за дозвола, кое го испратиле лани на 24 ноември, откако претходно регулаторот обезбедил 50 отсто намалување
Доколку тие барања се во рамки на можностите во услови на оваа криза, а знам дека во времето на коронакризата Владата даде препораки, верувам дека може да даде препорака за неплаќање или делумно плаќање на надоместоците што ги плаќаат сите медиуми, а не само регионалните. Може да се разговара, меѓутоа одлуката ќе зависи од координациите или одлуките од другите институции не само на Владата, изјави премиерот Димитар Ковачевски, одговарајќи на новинарско прашање за најавениот штрајк и барањата на регионалните и локалните медуми.
Здружените на локалните и регионалните медиуми „Медиум објектив“ за вечер од 19:00 до 19:30 часот најави штрајк на 96 медиуми со прекин на програмата. Тие бараат од Владата да биде прифатено нивното барање за ослободување од 50 отсто за плаќањето на надоместокот за дозвола, кое го испратиле лани на 24 ноември, откако претходно регулаторот обезбедил 50 отсто намалување.
„Покрај тоа, подолг временски период бараме промена на Законот за АВМУ, посебно во делот на казнените одредби каде локално радио и национална телевизија за истиот прекршок се казнуваат исто, формирање на Фонд за медиуми и дополнување на членот 102 од Законот за АВМУ“,
изјави Димитар Мицев, претседател на „Медиум објектив“.
Ковачевски рече дека во однос на барањата ќе разговара со министерот за информатичко општество и администрација, бидејќи медиумите се во надлежност на тоа Министерство.
„Но, треба да бидеме свесни дека во сферата на медиумите постојат и други институции коишто не се субординирани на Владата, а тоа е Агенцијата за аудиовизуелни медиуми, којашто исто така добива дел од тие приходи, потоа Агенцијата за електронски комуникации и решение може да се бара единствено низ координација на тие три институции, значи Министерството и двете институции“,
истакна Ковачевски.
Получасовниот штрајк ќе трае во наредните две недели и доколку не се исполнат барањата, но тогаш прекинот на програмата ќе се зголеми на еден час, а медиумите ќе престанат да ги следат активностите на претставниците на локалната самоуправа и јавните претпријатија во информативните блокови и ќе ги повлечат екипите од прес-конференциите.