Повеќе од 90 проценти од Британците развиле антитела на коронавирусот по една доза од вакцината на „Астра Зенека или „Фајзер“, а по втората доза оваа бројка се искачува на речиси 100 проценти, покажува едно британско истражување.
Податоците се засновани врз студија на 8 517 луѓе во Англија и Велс.
Истражувањето покажало дека 96,42 проценти од луѓето што примиле каква било вакцина развиле антитела од 28 до 34 дена по првата доза. Процентот се искачил на 99,08 проценти во рок од седум до 14 дена од примањето на втората доза.
Двете вакцини биле подеднакво добри во активирањето антитела потребни за борба против ковид-19, откриле истражувачите од Универзитетскиот колеџ во Лондон (УЦЛ), пишува „Гардијан“.
„Ова е една од првите реални студии за вакцините против ковид-19 во Велика Британија и тоа е одлична вест. Ова е голем научен подвиг во борбата против најлошата пандемија во последните сто години“,
вели главната авторка на студијата Меди Шротри, која додава дека вакцините се многу ефикасни, особено со оглед на брзината со која се развиени.
Важно е да се напомене дека никој од учесниците во истражувањето немал антитела пред да ја прими првата доза на вакцината и сите потенцијални учесници во студијата што имале антитела биле исклучени.
Просечната возраст на учесниците во студијата била 65 години, бидејќи истражувањето било спроведено кај постара популација, која прва била вакцинирана во Велика Британија. Кампањата за вакцинација во Велика Британија започна на 8 декември 2020 година.
Истражувањето покажало дека нивото на антитела првично се зголемува побрзо кај луѓето што примиле вакцина на „Фајзер“ отколку во групата вакцинирана со „Астра Зенека“, но по четири недели и двете групи постигнале речиси исто ниво на антитела.
Истражувачите, исто така, откриле дека по првата доза на вакцината нивото на антитела е малку пониско кај постарите учесници, но по добивањето на втората доза се постигнува изедначено ниво на антитела во сите возрасни групи.
Исто така, забележано е дека нивото на антитела е помало кај луѓето што страдаат од малигни заболувања, кај оние што страдаат од дијабетес и срцеви заболувања. Но, таа разлика исчезнала откако сите учесници во студијата добиле втора доза, покажува студијата.
„Податоците на ‘UCL Virus Watch’ сугерираат дека развојот на антитела кај постарите лица и кај оние со историја на одредени болести е нешто послаб по првата доза на вакцината, но е многу силен по втората доза. Тоа е потсетување за важноста на втората доза на вакцината, а во исто време е охрабрувачки факт бидејќи вакцините се наш излез од оваа пандемија“,
вели професорот Роб Олдриџ
Коавторите на студијата, која поминала рецензија пред да биде објавена во медицински списанија, велат дека нивните откритија сугерираат дека секој треба да ги прими двете дози на вакцината за да се смета за „безбеден“, особено кога станува збор за стари лица и лица со претходни здравствени проблеми.
Досега повеќе од 20 милиони Британци ги примиле двете дози на вакцината против коронавирус.