Поради несогласувањата, како што брифираат дипломати од Брисел за западните медиумите, дискусиите за предлогот ембаргото за руската нафта да влезе во шестиот пакет санкции ќе бидат тешки
Европската Комисија деновиве треба да го финализира новиот, шести пакет санкции за Русија поради нејзината инвазија на Украина, а во Брисел течат разговори околу забраната за купување руска нафта.
Германскиот министер за економија, Роберт Хабек, денеска изјави дека Германија може да живее без руска нафта до крајот на годинава.
„Успеавме да дојдеме до ситуација Германија да може да поднесе ембарго за купување нафта од Русија“
рече Хабек предупредувајќи дека тоа не значи и дека ќе нема последици.
Германија успеа да го намали уделот на нафтата од Русија за задоволување на своите потреби од 35 на 25 отсто, но сè уште работи на изнаоѓање алтернативни добавувачи со цел да се пополни празнината во случај на целосно ембарго.
Сепак, во ЕУ нема единство околу забраната за руска нафта. Хабек тоа го истакна и на прес-конференцијата која ја одржа денес.
Унгарија како членка на Унијата јасно го кажа својот став дека се против на забраната за увоз на руски нафта и гас со оглед дека во голема мера се потпира токму на испораките од Русија. И владата на реизбраниот премиер Виктор Орбан веќе изрази јасно противење на санкциите.
Поради несогласувањата, како што брифираат дипломати од Брисел за западните медиумите, дискусиите за предлогот ембаргото за руската нафта да влезе во шестиот пакет санкции ќе бидат тешки.