Во болниците во Грција се примени 192 пациенти со ковид, што е за 13,6 отсто повеќе од вчера, а просечната возраст на заболените е 37 години
Грчката јавноздравствена организација (ЕОДИ) објави дека бројката на заразени со коронавирус повторно расте во таа земја.
Денеска се регистрирани 10 474 нови случаи на заразени со коронавирус, а починале 17 лица, додека на респиратор се 88 пациенти кои се во тешка состојба. Тоа се претежно невакцинирани или делумно вакцинирани лица.
Во болниците во Грција се примени 192 пациенти со ковид, што е за 13,6 отсто повеќе од вчера, а просечната возраст на заболените е 37 години.
Според најновите податоци за состојбата со епидемијата на грчките острови и во градовите, Миконос води со скок по бројот на заразени за 50,89 отсто, Санторини е втор (33,51 отсто), а Милос е трет (32,31 отсто). ).
Со зголемување на бројот на заразени над 20 отсто, следуваат Парос, Западна Атика каде е и Атина и Карпатос, додека на другите поголеми острови и во градовите во Грција порастот е од 10 на 20 отсто.
Се повеќе има грчки здравствени експерти кои се залагаат повторно да се преземат мерки за ублажување на пандемијата, кои се целосно укинати со почетокот на туристичката сезона на 1 мај.
Експертите посочуваат дека новиот бран на пандемијата започна на почетокот на јуни и сега е во фаза на развој во Грција, а имунитетот на новите варијанти на коронавирусот трае пократко од порано.